“நாங்க சொல்லவே இல்ல” மிரட்டிய ஈரான்… அடிபணிய மறுத்த அமெரிக்கா.. எண்ணெய் தடைகளை நீக்க வாஷிங்டன் அதிரடி மறுப்பு… உலகையே உலுக்கும் அடுத்த கட்ட மோதல்..!!

அமைதிப் பேச்சுவார்த்தை உடன்படிக்கையின் ஒரு பகுதியாக, ஈரானின் எண்ணெய் ஏற்றுமதி மீதான பொருளாதாரத் தடைகளைத் தற்காலிகமாக நீக்குவதற்கு அமெரிக்கா ஒப்புக்கொண்டுள்ளதாக வெளியான தகவல்களை அமெரிக்க அரசு அதிகாரிகள் திட்டவட்டமாக மறுத்துள்ளனர். முன்னதாக, ஈரான் அரசுடன் தொடர்புடைய ஊடகங்கள் வெளியிட்ட செய்தியில், இரு நாடுகளுக்கும் இடையே நடைபெறும் தற்போதைய பேச்சுவார்த்தை முடியும் வரை ஈரானிய எண்ணெய் துறை மீதான தடைகளை அமெரிக்க நிதித்துறையின் வெளிநாட்டு சொத்துக்கள் கட்டுப்பாட்டு அலுவலகம் (OFAC) தற்காலிகமாக நிறுத்தி வைக்க முன்வந்துள்ளதாகக் கூறப்பட்டிருந்தது.

மேற்கு ஆசியாவில் நிலவி வரும் பதற்றத்தைத் தணிக்கும் நோக்கில், பாகிஸ்தான் நாட்டின் தூதரக மத்தியஸ்தம் மூலம் அமெரிக்கா மற்றும் ஈரான் இடையே தீவிரப் பேச்சுவார்த்தைகள் நடந்து வருகின்றன. இந்தச் சூழலில், ஈரானின் எண்ணெய் தடைகளை அமெரிக்கா தளர்த்தப் போவதாக வெளியான செய்தி சர்வதேச எரிசக்தி சந்தையிலும் அரசியல் வட்டாரத்திலும் பெரும் பரபரப்பை ஏற்படுத்தியது. இருப்பினும், ஊடகங்களில் உலா வரும் இந்தத் தகவல் முற்றிலும் தவறானது என்றும், ஈரானின் எண்ணெய் மீதான தடைகளை நீக்குவதற்கு அமெரிக்கா எவ்வித உடன்பாடும் எட்டவில்லை என்றும் அமெரிக்க அதிகாரிகள் தெளிவுபடுத்தியுள்ளனர்.

அமெரிக்கா மற்றும் இஸ்ரேல் தரப்பில் ஈரானுக்கு எதிராக மேற்கொள்ளப்பட்ட தாக்குதல்களுக்குப் பிறகு, ஹார்முஸ் நீரிணையை மூடுவது உள்ளிட்ட கடுமையான பதிலடிகளை ஈரான் வழங்கியதால் உலகளாவிய கச்சா எண்ணெய் விலை கடுமையாக உயர்ந்தது. இதனால் சர்வதேச சந்தையில் ஏற்பட்டுள்ள அழுத்தத்தைக் கட்டுப்படுத்தவும், அமைதியை நிலைநாட்டவும் பேச்சுவார்த்தைகள் நீடித்தாலும், ஈரானின் அணுசக்தித் திட்டம் மற்றும் பிராந்திய செயல்பாடுகளில் முறையான தீர்வு எட்டப்படும் வரை அதன் முக்கிய வருவாய் ஆதாரமான எண்ணெய் மீதான “அதிகபட்ச அழுத்தம்” மற்றும் பொருளாதாரத் தடைகள் தொடரும் என்றே அமெரிக்கத் தரப்பு தற்போதைய மறுப்பின் மூலம் மறைமுகமாக உணர்த்தியுள்ளது.