காலையிலேயே குட் நியூஸ்… தமிழகம் முழுவதும் ரேஷன் கடைகளில் இனி… ஊழியர்களுக்கு அமைச்சர் போட்ட அதிரடி உத்தரவு…!

ரேஷன் கடைகளுக்கு வரும் பொதுமக்களிடம் ஊழியர்கள் கனிவாகவும், மரியாதையுடனும் நடந்து கொள்ள வேண்டும் என்று கூட்டுறவுத் துறை அமைச்சர் காந்திராஜ் அவர்கள் அறிவுறுத்தியுள்ளார். ராணிப்பேட்டை மாவட்டம் அரக்கோணம் அருகே உள்ள வெங்கடேசபுரம் பகுதியில் செயல்பட்டு வரும் கற்பகம் ரேஷன் கடையில் நேற்று அவர் திடீர் ஆய்வு மேற்கொண்டார். இந்த ஆய்வின் போது, பொதுமக்களுக்கு விநியோகிக்கப்படும் அரிசி, பருப்பு, பாமாயில் போன்ற அத்தியாவசியப் பொருட்களின் தரம் மற்றும் எடையை அவர் நேரில் பரிசோதித்து, மக்களின் குறைகளையும் கேட்டறிந்தார்.

அமைச்சரின் இந்த ஆய்வின் போது, ரேஷன் கடைகளில் பொருட்கள் வழங்குவதில் தாமதம் ஏற்படுவதாகவும், சில இடங்களில் தரம் குறித்த புகார்கள் இருப்பதாகவும் பொதுமக்கள் தங்களது ஆதங்கங்களை நேரடியாகத் தெரிவித்தனர். இதைக் கேட்டறிந்த அமைச்சர், குடும்ப அட்டைதாரர்களுக்குச் சரியான எடையில் அத்தியாவசியப் பொருட்கள் வழங்கப்பட வேண்டும் என்றும், இதில் எந்தவிதமான முறைகேடுகளோ அல்லது தவறுகளோ நடக்கக் கூடாது என்றும் ஊழியர்களுக்குக் கடுமையான உத்தரவுகளைப் பிறப்பித்தார்.

மேலும், கிடங்குகளில் இருந்து தரம் குறைந்த உணவுப் பொருட்கள் விநியோகத்திற்கு வந்தால், அவற்றை ஊழியர்கள் எக்காரணம் கொண்டும் ஏற்கக் கூடாது என்றும், உடனடியாக அவற்றை திருப்பி அனுப்ப வேண்டும் என்றும் அமைச்சர் அறிவுறுத்தினார். மக்கள் பயன்படுத்த முடியாத நிலையில் பொருட்கள் இருந்தால், அதைத் தடுத்து நிறுத்தி, உடனடியாக உயர் அதிகாரிகளின் கவனத்திற்கும், தனது பார்வைக்கும் கொண்டு வர வேண்டும் என்று குறிப்பிட்ட அவர், ஏழை எளிய மக்கள் நம்பிக்கையோடு வரும் ரேஷன் கடைகளில் தரத்தை உறுதி செய்வது மிக முக்கியம் என்றார்.

தமிழகத்தில் பொதுவிநியோகத் திட்டம் என்பது சுமார் 2 கோடியே 23 லட்சம் குடும்ப அட்டைதாரர்களுக்குச் சேவை வழங்கும் மிக முக்கியமான மக்கள் நலத் திட்டமாகும். சென்னை உட்பட 38 மாவட்டங்களில் உள்ள 34,792 ரேஷன் கடைகள் மூலம் இப்பணிகள் தொய்வின்றி நடக்க வேண்டும் என்பதே அரசின் நோக்கமாகும். சமீபகாலமாக எழுந்த எடை குறைவு மற்றும் ஊழியர்களின் அலட்சியப் போக்கு குறித்த புகார்களைத் தொடர்ந்து இந்த அதிரடி உத்தரவு பிறப்பிக்கப்பட்டுள்ளது என்றும், விதிமுறைகளை மீறுவோர் மீது கடும் நடவடிக்கை எடுக்கப்படும் என்றும் அதிகாரிகள் எச்சரித்துள்ளனர்.