ஆர்சிபி வெற்றிக்கு பின் அழுத விராட் கோலி… சமாதானம் செய்த அனுஷ்கா ஷர்மா..? சமூக வலைத்தளங்களில் தீயாய் பரவும் வீடியோவின் உண்மை பின்னணி..?

ஐபிஎல் 2026 இறுதிப்போட்டியில் ராயல் சேலஞ்சர்ஸ் பெங்களூரு (RCB) அணி வரலாற்று வெற்றி பெற்றதைத் தொடர்ந்து, விராட் கோலி கோப்பையுடன் உணர்ச்சிவசப்பட்டு அழுவதும், அவரை அனுஷ்கா சர்மா கட்டிப்பிடித்து ஆறுதல் கூறுவது போன்ற ஒரு வீடியோ சமூக வலைதளங்களில் வைரலாகி வருகிறது. அகமதாபாத்தில் நடந்த உண்மையான கொண்டாட்டத்தின் போது எடுக்கப்பட்ட நிஜமான தருணம் இது என ரசிகர்கள் பலரும் நம்பி இதனைப் பகிர்ந்து வந்தனர். ஆனால், இணையத்தில் பரவும் இந்த வீடியோ முற்றிலும் போலியானது என்று உண்மைச் சரிபார்ப்பில் தெரியவந்துள்ளது.

இந்த வைரல் வீடியோவை உற்று நோக்கும் போது, அது செயற்கை நுண்ணறிவு தொழில்நுட்பக் கருவிகளைக் கொண்டு போலியாக உருவாக்கப்பட்டது என்பதற்கான பல ஆதாரங்கள் கிடைத்துள்ளன. குறிப்பாக, ஐபிஎல் இறுதிப்போட்டியின் போது அனுஷ்கா சர்மா கழுத்தில் அணிந்திருந்த புகழ்பெற்ற ‘துளசி மாலை’ இந்த வைரல் வீடியோவில் முற்றிலும் விடுபட்டுள்ளது. மேலும், வீடியோவில் காட்டப்படும் ஐபிஎல் கோப்பையின் வடிவமும், நிஜமான கோப்பையின் வடிவத்தில் இருந்து மாறுபட்டுக் காணப்படுகிறது.

இவை தவிர, வீடியோவில் உள்ள விராட் கோலி மற்றும் அனுஷ்கா சர்மாவின் முகபாவனைகள், உடல் அசைவுகள், பின்னணி விவரங்கள் மற்றும் வர்ணனை போன்ற பல விஷயங்கள் இயற்கைக்கு மாறாக, ஏஐ மூலம் உருவாக்கப்பட்டதை உறுதி செய்கின்றன. இறுதிப்போட்டி வெற்றிக்குப் பிறகு விராட் கோலி தனது குடும்பத்தினருடனும், ரசிகர்களுடனும் மகிழ்ச்சியைப் பகிர்ந்துகொண்ட பல உண்மையான நெகிழ்ச்சியான வீடியோக்கள் இணையத்தில் வெளியாகி இருக்கும் வேளையில், இந்த குறிப்பிட்ட அழுகை வீடியோ மட்டும் போலியானது எனத் தெளிவுபடுத்தப்பட்டுள்ளது.