இது என்னடா பகல் கொள்ளையா இருக்கு!… சிறு காயத்திற்கு 13,000 பில்லா?… தனியார் மருத்துவமனையின் முகத்திரையை கிழித்த இளைஞரின் வைரல் வீடியோ…!!

குர்கானில் உள்ள பார்க் மருத்துவமனை (Park Hospital) மீது நோயாளி ஒருவர் சுமத்தியுள்ள புகார்கள் மருத்துவத்துறையில் நிலவும் லாப நோக்கை வெளிச்சம் போட்டுக் காட்டியுள்ளன. ஒரு சிறிய காயத்திற்காக சிகிச்சை பெறச் சென்ற அந்த இளைஞர், சுமார் இரண்டு மணி நேரம் எவ்வித சிகிச்சையும் இன்றி காத்திருக்க வைக்கப்பட்டதாகக் குற்றம் சாட்டியுள்ளார். தொடக்கத்திலேயே கட்டாயமாகப் பணம் வசூலிக்கப்பட்ட போதிலும் முறையான சிகிச்சை அளிக்கப்படவில்லை என்றும், மாறாக “பரிசோதனை கட்டணம்” (Investigation Bill) என்ற பெயரில் 13,000 ரூபாய் பில் போடப்பட்டதாகவும் அவர் வேதனையுடன் தெரிவித்துள்ளார்.

சிகிச்சை திருப்தி அளிக்காததால் அந்த இளைஞர் வேறு மருத்துவமனைக்குச் செல்ல முயன்றபோது, மருத்துவமனை ஊழியர்கள் அவரை வெளியேற விடாமல் தடுத்ததோடு, இடமாற்றம் செய்வதற்கும் முட்டுக்கட்டை போட்டதாகக் கூறப்படுகிறது. இந்த அராஜகப் போக்கை அந்த இளைஞர் மருத்துவமனையின் உள்ளேயே வீடியோ எடுத்து சமூக வலைதளங்களில் பகிர்ந்துள்ளார். இந்த வீடியோ தற்போது வைரலாகி வரும் நிலையில், தனியார் மருத்துவமனைகளின் கட்டணக் கொள்ளை மற்றும் நோயாளிகளை நடத்தும் விதம் குறித்து பொதுமக்களிடையே கடும் கண்டனங்கள் எழுந்துள்ளன.