பாலஸ்தீன பெண்களுக்கு எதிரான வன்முறை.. ஐநா-வின் கறுப்புப் பட்டியலில் இஸ்ரேல்..! அதிரடி நடவடிக்கையின் பின்னணி என்ன..?

ஐக்கிய நாடுகள் சபையின் (UN) மோதல் கால பாலியல் வன்முறை தொடர்பான வருடாந்திர அறிக்கையின் கறுப்புப் பட்டியலில் இஸ்ரேல் சேர்க்கப்பட்டுள்ளது. போர் மற்றும் மோதல் பகுதிகளில் பாலஸ்தீனப் பெண்களுக்கு எதிராக இஸ்ரேலியப் படைகள் திட்டமிட்ட முறையில் பாலியல் வன்முறைகளை அரங்கேற்றியதாகக் கூறப்படும் குற்றச்சாட்டுகளின் அடிப்படையில் இந்த நடவடிக்கை எடுக்கப்பட்டுள்ளது. ஐநா-வின் இந்த கறுப்புப் பட்டியலில் இஸ்ரேல் இராணுவம் சேர்க்கப்படுவது இதுவே முதல்முறையாகும்.

பாலஸ்தீனக் கைதிகள் அடைக்கப்பட்டுள்ள சிறைகள் மற்றும் தடுப்புக்காவல் மையங்களில் இஸ்ரேலியப் பாதுகாப்புப் படையினர் பாலியல் வன்முறைகளில் ஈடுபட்டதாக ஐநா-விடம் நம்பகமான ஆதாரங்கள் சமர்ப்பிக்கப்பட்டுள்ளன. மேலும், இது தொடர்பாக ஆய்வு செய்யச் சென்ற ஐநா-வின் கண்காணிப்புக் குழுவினரை இஸ்ரேல் தங்களுக்குரிய இடங்களுக்குள் அனுமதிக்க மறுத்ததாகவும் கூறப்படுகிறது. இந்தச் சூழலில், பாலியல் வன்முறையைப் போரின் ஆயுதமாக இஸ்ரேல் பயன்படுத்துவதாக ஐநா குற்றம்சாட்டியுள்ளது.

ஐநா சபை எடுத்துள்ள இந்த முடிவுக்கு இஸ்ரேல் கடும் கண்டனம் தெரிவித்துள்ளது. இந்த குற்றச்சாட்டுகள் முற்றிலும் அடிப்படையற்றவை என்றும், தங்களைப் பயங்கரவாத அமைப்பான ஹமாஸுடன் ஒரே பட்டியலில் வைப்பது ஏற்றுக்கொள்ள முடியாத ஒன்று என்றும் ஐநா-வுக்கான இஸ்ரேலிய தூதர் டேனி டானோன் தெரிவித்துள்ளார். மேலும், இந்த விவகாரத்தால் ஐநா பொதுச்செயலாளர் அந்தோனியோ குட்டெரெஸ் மற்றும் அவரது அலுவலகத்துடனான அனைத்து தொடர்புகளையும் இஸ்ரேல் முற்றிலும் துண்டித்துக் கொள்வதாக அறிவித்துள்ளது.