எங்க போனிங்க இவளோ நாள்..! ஆடியன்ஸ் பெருசு ஆனா என் பாணி மாறல… முன்னணி ஹீரோக்கள் பற்றி வினோத் ஓபன் டாக்…!!

‘சதுரங்க வேட்டை’, ‘தீரன் அதிகாரம் ஒன்று’ போன்ற தனித்துவமான படங்களின் மூலம் தமிழ் சினிமாவில் தனக்கென ஒரு சிறப்பான இடத்தை பிடித்தவர் இயக்குநர் ஹெச். வினோத். தொடக்கத்தில் குறைந்த பொருட்செலவில் வலுவான கதைகளை இயக்கி வெற்றி கண்ட இவர், அடுத்ததாக அஜித் மற்றும் விஜய் போன்ற முன்னணி உச்ச நட்சத்திரங்களை வைத்து மாபெரும் பட்ஜெட் படங்களை இயக்கும் வாய்ப்பை பெற்றார். கதையை மட்டுமே நம்பி இயக்கி வந்த அவர், கமர்ஷியல் ஹீரோக்களுடன் இணைந்தது அவருடைய தனித்துவமான கதை சொல்லும் பாணியை மாற்றிவிட்டதா என்ற கேள்வியை பலரது மத்தியிலும் எழுப்பியது.

இது குறித்து சமீபத்தில் அவரிடம், “அஜித் மற்றும் விஜய் போன்ற பெரிய நடிகர்களுடன் பணியாற்றியது உங்களை ‘இன்ஃபுளியன்ஸ்’ செய்துவிட்டதா?” என நேரடியாகக் கேட்கப்பட்டது. இதற்குப் பதிலளித்த வினோத், “யாராவது என்னை இன்ஃபுளியன்ஸ் செய்வதற்கு நான் என்ன சிறு குழந்தையா?” என்று தனது பாணியில் கூலாகவும், அதே சமயம் நெத்தியடியாகவும் தெரிவித்தார். பெரிய நடிகர்களுடன் இணையும் போது அவர்களுடைய மாபெரும் ரசிகர் பட்டாளத்தின் எதிர்பார்ப்புகளையும் திருப்திப்படுத்த வேண்டிய பொறுப்பு தனக்கு இருப்பதாகவும், அதனை அவர்கள் தன்மீது செலுத்தும் ஆதிக்கம் என்று தவறாகப் புரிந்துகொள்ளக் கூடாது என்றும் அவர் தெளிவுபடுத்தினார்.

மேலும், உச்ச நட்சத்திரங்களை வைத்து ஏன் படம் இயக்கினீர்கள் என்ற கேள்விக்கு அவர் அளித்த பதிலும் அனைவரையும் ஈர்த்துள்ளது. “என்னிடம் வேலை இல்லை, வேலை கேட்டேன், அவர்கள் வாய்ப்பு கொடுத்தார்கள், அதனால் படம் பண்ணினேன்” என்று எவ்வித பந்தாவும் இன்றி மிகவும் யதார்த்தமாகப் பதிலளித்துள்ளார். வினோத்தின் இந்த நேர்மையான மற்றும் வெளிப்படையான பேச்சின் மூலம், பெரிய நடிகர்களின் படங்களை இயக்கும்போது அந்த ஆடியன்ஸுக்காக சில விஷயங்களைச் சேர்த்தாலும், இயக்குநராக அவருடைய அடிப்படைத் தன்மையும் சினிமா சிந்தனையும் எந்த வகையிலும் மாறிவிடவில்லை என்பது தெளிவாகிறது.