விஜயகாந்தை ஒதுக்கி வைத்த தமிழ் திரையுலகம், டயலாக்கே சொல்லத்தெரியாமல் திணறிய கேப்டன், இப்படி எல்லாம் நடந்திருக்கா?

விஜயகாந்த் தமிழர்களின் நெஞ்சங்களை ஆட்கொண்ட நடிகராக திகழ்ந்து வந்தவர். ரஜினிகாந்த், கமல்ஹாசன் ஆகியோர் கொடிகட்டி பறக்கத்தொடங்கிய காலகட்டத்தில் தனக்கென தனி பாணியை உருவாக்கிக்கொண்டு மக்களின் மனதை கவர்ந்தவர்தான் விஜயகாந்த். அப்படிப்பட்ட விஜயகாந்தையே திரையுலகம் ஒரு கட்டத்தில் ஒதுக்கி வைத்துவிட்டதாம்.

அனைத்து நடிகர்களுக்கும் அவர்களது கெரியரில் ஏறுமுகம் இறங்குமுகம் என இரண்டும் கலந்தே இருக்கும். விஜயகாந்திற்கும் இது விதிவிலக்கு அல்ல. ஒரு காலகட்டத்தில் கிட்டத்தட்ட 10க்கும் மேற்பட்ட விஜயகாந்த் திரைப்படங்கள் தொடர்ந்து ஃப்ளாப் ஆனதாம். இதனால் விஜயகாந்த்தை வைத்து படமெடுக்க யாரும் முன்வரவே இல்லையாம். 2 ஆண்டுகள் படமே நடிக்காமல் இருந்தாராம்.

இந்த நிலையில் இயக்குனர் எஸ்.ஏ.சந்திரசேகர் ஹாலிவுட்டில் வெளிவந்த “மேட்மாக்ஸ்” என்ற திரைப்படத்தை பார்த்துவிட்டு இதனை தமிழில் தழுவி படமாக்கலாம் என்று முடிவெடுத்தாராம். அவ்வாறு தயாரிப்பாளர் பி.எஸ்.வீரப்பாவை சந்தித்து அந்த கதையை கூறியிருக்கிறார். அவரும் ஓகே சொல்ல, விஜயகாந்தை கதாநாயகனாக நடிக்க வைக்கலாம் என்று முடிவு செய்யப்பட்டதாம்.

அதனைத் தொடர்ந்து முதல் நாள் படப்பிடிப்பில் விஜயகாந்த்திற்கு வசனம் கொடுக்கப்பட்டிருக்கிறது. ஆனால் அவரால் வசனமே பேசமுடியவில்லையாம். இரண்டு வருடங்கள் திரைப்படங்களில் நடிக்காமல் போனதால் அவரால் சரளமாக வசனம் பேச முடியவில்லையாம்.

அன்றைக்கு விஜயகாந்தை வீட்டிற்கு அனுப்பிவிட்டு வேறு நடிகர்களின் காட்சிகளை படமாக்கியிருக்கிறார்கள். அடுத்த நாள் மீண்டும் வந்த விஜயகாந்த், அவருக்கு கொடுக்கப்பட்ட வசனத்தை கச்சிதமாக அவரது பாணியில் பேசினாராம். இதனை பார்த்து ஆச்சரியப்பட்ட படக்குழுவினர் கைத்தட்டி பாராட்டினார்களாம்.