“எடப்பாடி முதல்வர்.. திமுக ஆதரவு?”… தமிழக அரசியலில் உச்சக்கட்ட பரபரப்பு… விஜய் போட்ட ‘வாட்ஸ்அப்’ மெசேஜ்… ஆடிப்போன திராவிடக் கோட்டைகள்…!

தமிழக சட்டசபைத் தேர்தல் முடிவுகள் வெளியாகி, எந்தக் கட்சிக்கும் தனிப்பெரும் பெரும்பான்மை கிடைக்காத நிலையில், மாநில அரசியல் களம் முன்னெப்போதும் இல்லாத ஒரு பரபரப்பான கட்டத்தை எட்டியுள்ளது. 108 இடங்களைப் பிடித்து தனிப்பெரும் கட்சியாக உருவெடுத்திருக்கும் தமிழக வெற்றிக் கழகம் (தவெக), ஆட்சியைப் பிடிக்கத் தேவையான மேஜிக் நம்பரை எட்ட இன்னும் 6 எம்எல்ஏக்களின் ஆதரவை எதிர்நோக்கியுள்ளது. காங்கிரஸ் ஏற்கனவே ஆதரவு தெரிவித்துள்ள நிலையில், விசிக, சிபிஐ மற்றும் சிபிஎம் ஆகிய கட்சிகளின் முடிவே தற்போதைய அதிகார மையத்தின் திசையைத் தீர்மானிக்கும் காரணியாக மாறியுள்ளது.

இந்நிலையில், தமிழக அரசியலில் “எதிரிக்கு எதிரி நண்பன்” என்ற சொல்லுக்கிணங்க, பரம எதிரிகளான திமுகவும் அதிமுகவும் கைகோர்க்க வாய்ப்புள்ளதாக வெளியாகும் தகவல்கள் பெரும் அதிர்வலைகளை ஏற்படுத்தியுள்ளன. அண்ணா அறிவாலயத்தில் நடந்த திமுக எம்எல்ஏக்கள் கூட்டத்திலும், புதுச்சேரியில் நடந்த அதிமுக கூட்டத்திலும் தலைமை எடுக்கும் முடிவுக்கு கட்டுப்படுவதாக தீர்மானங்கள் நிறைவேற்றப்பட்டுள்ளன. குறிப்பாக, திமுக வெளியில் இருந்து ஆதரவு அளிக்க, எடப்பாடி பழனிசாமி தலைமையில் ஆட்சி அமையலாம் என்றும், இதர கூட்டணிக் கட்சிகளுக்கு அமைச்சரவையில் இடமளிக்க பேச்சுவார்த்தை நடப்பதாகவும் கூறப்படுவது அரசியல் வட்டாரங்களில் தீயாய் பரவி வருகிறது.

இந்தச் சூழலை முன்கூட்டியே கணித்திருந்த தவெக தலைவர் விஜய், திமுக மற்றும் அதிமுக இணைந்து ஆட்சி அமைக்க உரிமை கோரினால், தனது கட்சியின் 107 எம்எல்ஏக்களும் ஒட்டுமொத்தமாக பதவியை ராஜினாமா செய்வார்கள் என அதிரடி அறிவிப்பை வெளியிட்டுள்ளதாகத் தெரிகிறது. மக்கள் தீர்ப்புக்கு எதிராக இரு பெரும் திராவிடக் கட்சிகளும் கூட்டணி அமைப்பதை எதிர்த்து, மீண்டும் தேர்தலைச் சந்திக்கும் வகையில் இந்த “மாற்றுத் திட்டம்” ஆலோசிக்கப்பட்டு வருகிறது. “விஜய்யை எதிர்க்க திமுகவும் அதிமுகவும் ஒன்றிணையும்” என்று அக்கட்சியின் செய்தித் தொடர்பாளர் லயோலா மணி முன்பு கூறியது, தற்போது நிஜமாகும் சூழல் உருவாகியுள்ளது.

கடந்த காலங்களில் எட்டாக்கனியாக இருந்த திமுக – அதிமுக கூட்டணி என்பது தற்போது சாத்தியமாகுமா அல்லது தவெகவின் ராஜினாமா மிரட்டல் அரசியல் களத்தில் மாற்றத்தை ஏற்படுத்துமா என்பது நாளை தெரியவரும். ஒருவேளை தவெக எம்எல்ஏக்கள் ராஜினாமா செய்தால், தமிழகம் மீண்டும் ஒரு பொதுத்தேர்தலைச் சந்திக்க நேரிடும் என்பதால், ஆளுநரின் நடவடிக்கை மற்றும் இதர கட்சிகளின் நிலைப்பாடு குறித்து ஒட்டுமொத்த தமிழகமும் மிகுந்த எதிர்பார்ப்புடன் காத்திருக்கிறது. திராவிட அரசியலுக்கு மாற்றாகத் தோன்றிய தவெக, இந்த இக்கட்டான சூழலை எப்படிக் கையாளப்போகிறது என்பதே இப்போதைய மில்லியன் டாலர் கேள்வி.