“விஜய்யிடம் இருந்து திடீரென வந்த போன் கால்…” என்ன விஷயம்…? ‘பத்தா’ இசை வெளியீட்டு விழாவில் ரகசியத்தை உடைத்த விஜய் சேதுபதி…!!

பாலாஜி தரணிதரன் இயக்கத்தில் ‘மக்கள் செல்வன்’ விஜய் சேதுபதி நடித்துள்ள ‘பத்தா’ திரைப்படத்தின் இசை வெளியீட்டு விழா சென்னையில் விமரிசையாக நடைபெற்றது. சமீபத்தில் பிக்பாஸ் நிகழ்ச்சியில் விஜய் சேதுபதி பேசிய கருத்துகள், அரசியல் களம் கண்டுள்ள விஜய்யை மறைமுகமாகத் தாக்குவதாகப் பலவிதமான சர்ச்சைகள் எழுந்து வந்தன.

இந்நிலையில், அனைத்து வதந்திகளுக்கும் முற்றுப்புள்ளி வைக்கும் விதமாக ‘பத்தா’ விழாவில் மேடையேறிய விஜய் சேதுபதி, விஜய்யும் தானும் எவ்வளவு நெருங்கிய நண்பர்கள் என்பதைப் பகிரங்கமாக வெளிப்படுத்தினார். “ஒருமுறை ஜேசன் சஞ்சயின் பிறந்தநாளுக்கு நான் வாழ்த்து தெரிவித்திருந்தேன். உடனே விஜய் எனக்கு போன் செய்து, ‘நண்பா ரொம்ப நன்றி, அவன் ரொம்ப சந்தோஷப்பட்டான்’ என்று உருக்கமாகப் பேசினார். எனக்கு அது மிகவும் ஆச்சரியமாக இருந்தது. அதன் பிறகு நான் சஞ்சயிடம், ‘டேய் என்னடா உங்க வீட்டில் நீ எவ்வளவு பெரிய ஆளை வெச்சிருக்க’ என்று செல்லமாகக் கேட்டேன்” எனக் கூறி அரங்கை அதிர வைத்தார்.

மேலும், “ஜேசன் சஞ்சய் ரொம்பவே தங்கமான பையன். அவர் இயக்கியுள்ள ‘சிக்மா’ படத்தின் படப்பிடிப்பு தளத்திற்கு நேரில் சென்று வாழ்த்தி வந்தேன்” என்றும் விஜய் சேதுபதி பெருமையுடன் தெரிவித்தார். இணையத்தில் இரு தரப்பு ரசிகர்களுக்கிடையே போலி மோதல்கள் சித்தரிக்கப்பட்டு வந்த நிலையில், விஜய் சேதுபதியின் இந்த நெகிழ்ச்சியான பேச்சு இணையத்தில் வைரலாகி வருகிறது.