கொள்கையில் பெண் உரிமை… அதிகாரத்தில் புறக்கணிப்பா..? பெண் நிர்வாகிகளின் அடுத்தடுத்த புகார்களால் விஜய்க்கு சிக்கல்..!!

விஜய் தலைமையிலான தமிழக வெற்றிக் கழகம் வீரமங்கை வேலுநாச்சியாரைத் தனது அரசியல் வழிகாட்டிகளில் ஒருவராக முன்னிறுத்தி வரும் வேளையில், கட்சிக்குள் பெண்களுக்கு உண்மையான சம உரிமை வழங்கப்படுகிறதா என்ற விவாதம் தற்பொழுது வலுத்துள்ளது. கட்சியின் முக்கிய நிர்வாகிகளாக இருந்த வைஷ்ணவி, தனக்குச் சரியான வாய்ப்புகள் மறுக்கப்படுவதாகக் கூறி கட்சியிலிருந்து விலகியது மற்றும் அரியலூரில் கட்சி கொடியேற்ற அனுமதி கிடைக்காததால் நிர்வாகி பிரியதர்ஷினி போராட்டத்தில் ஈடுபட்டது போன்ற சம்பவங்கள் இதற்குச் சான்றாக முன்வைக்கப்படுகின்றன. மேலும், அஜிதா என்ற நிர்வாகி தற்கொலை முயற்சிக்கு முயன்ற சம்பவம் அக்கட்சியின் பெண் தொண்டர்கள் மத்தியில் நிலவும் அதிருப்தியை வெளிச்சம் போட்டுக்காட்டியுள்ளது.

அரசியல் விமர்சகர்களின் கருதுகோளின்படி, தவெகவின் கொள்கைப் பாடல்களில் பெண்களின் வீரம் போற்றப்பட்டாலும், கட்சியின் அதிகாரப் மட்டத்தில் பெண்களுக்குப் போதிய முக்கியத்துவம் அளிக்கப்படவில்லை என்ற குற்றச்சாட்டு எழுந்துள்ளது. கட்சியின் உயர் பதவிகளில் இருக்கும் பெண்களுக்குக் கூட, பொதுச்செயலாளர் ஆனந்த் அல்லது ஆதவ் அர்ஜுனா போன்ற ஆண்களுக்கு இணையான அதிகாரம் அல்லது முடிவெடுக்கும் சுதந்திரம் இல்லை என்ற விமர்சனம் முன்வைக்கப்படுகிறது.