“பதவியேற்கும் முன்பே இப்படியா?… வாளால் கேக் வெட்டிய விஜய் தாமு… சர்ச்சையில் சிக்கிய த.வெ.க எம்.எல்.ஏ… வைரல் வீடியோவால் கொந்தளிக்கும் நெட்டிசன்கள்”…!!!

தமிழகச் சட்டமன்றத் தேர்தல் முடிவுகள் மாநில அரசியலில் ஒரு பெரும் அதிர்வலையை ஏற்படுத்தியுள்ளன. குறிப்பாக, 108 இடங்களைக் கைப்பற்றி தனிப்பெரும் கட்சியாக உருவெடுத்துள்ள தமிழக வெற்றிக் கழகத்தின் வேட்பாளர்கள், முதல்வர் மு.க.ஸ்டாலின் உள்ளிட்ட பல சீனியர் அமைச்சர்களைத் தோற்கடித்து வியப்பை ஏற்படுத்தியுள்ளனர். இதில் சென்னை ராயபுரம் தொகுதியில் போட்டியிட்ட த.வெ.க வேட்பாளர் விஜய் தாமு, அ.தி.மு.க-வின் மூத்த தலைவரும் ஐந்து முறை அமைச்சராக இருந்தவருமான ஜெயக்குமாரை சுமார் 14,249 வாக்குகள் வித்தியாசத்தில் வீழ்த்தி வரலாற்றுச் சாதனை படைத்துள்ளார். இத்தேர்தலில் முன்னாள் அமைச்சர் ஜெயக்குமார் தனது டெபாசிட்டையும் இழந்தது அரசியல் வட்டாரத்தில் பெரும் அதிர்ச்சியை ஏற்படுத்தியுள்ளது.

வெற்றி பெற்ற விஜய் தாமு, கடந்த 30 ஆண்டுகளாக விஜய் ரசிகர் மன்றம் மற்றும் மக்கள் இயக்கத்தில் தீவிரமாகப் பணியாற்றி வந்தவர். ஒரு சாதாரண ஆட்டோ ஓட்டுநராகத் தனது வாழ்க்கையைத் தொடங்கி, பின்னர் கட்சியின் மாவட்டச் செயலாளராக உயர்ந்த இவர், தி.மு.க மற்றும் அ.தி.மு.க போன்ற பலமான அரசியல் சக்திகளைத் தனது முதல் தேர்தலிலேயே ராயபுரம் மண்ணில் வீழ்த்திச் சட்டமன்ற உறுப்பினராகத் தேர்வாகியுள்ளார். எளிய பின்னணியில் இருந்து வந்து ஒரு பெரும் அரசியல் மாற்றத்தை நிகழ்த்திய இவருக்குத் தொகுதி மக்களிடையே பெரும் வரவேற்பு கிடைத்துள்ளது.

ஆயினும், இந்தத் தேர்தல் வெற்றியைக் கொண்டாடும் விதமாக மே 5-ஆம் தேதி நடைபெற்ற இவரது பிறந்தநாள் விழா பெரும் சர்ச்சையை ஏற்படுத்தியுள்ளது. விழாவின் போது தொண்டர்கள் பரிசளித்த இரண்டு அடி நீளமுள்ள வாளைக் கொண்டு விஜய் தாமு கேக் வெட்டிய காணொளி சமூக வலைதளங்களில் வைரலாகி வருகிறது. கட்சி நிர்வாகி லயோலா மணி என்பவர் இதனைத் தடுத்து அறிவுரை வழங்கிய போதிலும், அதைப் பொருட்படுத்தாமல் அவர் வாளால் கேக் வெட்டியது விவாதத்தை கிளப்பியுள்ளது. சட்டப்பேரவை உறுப்பினராகத் தேர்வான முதல் நாளிலேயே இத்தகைய செயலில் ஈடுபட்டது கட்சித் தலைமைக்கு தர்மசங்கடத்தை உருவாக்கியுள்ளது.