போயஸ் கார்டன் பங்களா… 100-க்கும் மேற்பட்ட சிறுமிகள்?… ஜெம் கிரானைட்ஸ் வீரமணி வழக்கில் வெளிவந்த பகீர் உண்மை….!

சிறுமிகள் பாலியல் வன்கொடுமைக்கு உள்ளாக்கப்பட்ட விவகாரத்தில், ஜெம் கிரானைட்ஸ் குழுமத் தலைவரும் பிரபல தொழிலதிபருமான 84 வயதான வீரமணி, மத்திய குற்றப்பிரிவு விபச்சாரத் தடுப்புப் பிரிவு போலீசாரால் கைது செய்யப்பட்டு தீவிர விசாரணைக்கு உட்படுத்தப்பட்டுள்ளார். இந்த வழக்கைக் காட்டும் வீடியோ ஆதாரம் கிடைத்தபோதிலும், பாதிக்கப்பட்ட சிறுமியை அடையாளம் காண முடியாமல் வழக்கை முடிக்க முந்தைய போலீசார் முற்பட்டனர். இருப்பினும், சிறப்பு போக்சோ நீதிமன்றம் அந்த முடிவை நிராகரித்து மறுவிசாரணைக்கு உத்தரவிட்டதால், அமைக்கப்பட்ட சிறப்பு குழுவினர் பாதிக்கப்பட்ட பெண்ணைக் கண்டறிந்து வாக்குமூலம் பெற்றனர். இதன் தொடர்ச்சியாக, ஆகஸ்ட் 29-ஆம் தேதி வீரமணி மற்றும் அவருக்கு உடந்தையாக செயல்பட்ட மேலாளர் சாந்தி, அவரது கணவர் மகேந்திரசிம்மன் ஆகியோர் கைது செய்யப்பட்டனர்.

போலீசாரின் விசாரணையில், சென்னை போயஸ் கார்டன் பகுதியில் மாதம் 2 லட்சம் ரூபாய் வாடகையில் பங்களா ஒன்றை எடுத்து, அங்கு சிறுமிகள் மற்றும் இளம்பெண்களை அழைத்துச் சென்று பாலியல் அத்துமீறல்களில் ஈடுபட்ட அதிர்ச்சித் தகவல்கள் வெளியாகியுள்ளன. ஆதரவற்ற மற்றும் ஏழை மாணவிகளுக்குக் கல்வி உதவி வழங்குவதாகக் கூறி நடத்தப்பட்ட அறக்கட்டளைகள் மற்றும் ஆசிரமங்கள் மூலமாகவே இச்சிறுமிகள் அணுகப்பட்டுள்ளனர். சாந்தி மற்றும் மகேந்திரசிம்மன் மூலம் கல்விச் செலவு, ஆடைகள், செல்போன் தருவதாக ஆசைவார்த்தை கூறி அழைத்து வரப்பட்ட சிறுமிகளுக்கு மதுபானம் வழங்கி, வீரமணி மற்றும் அவரது தொழில் கூட்டாளிகளுடன் பாலியல் தொடர்பில் ஈடுபடக் கட்டாயப்படுத்தியது தெரியவந்துள்ளது.

இந்தக் கொடூரச் சம்பவங்கள் பல ஆண்டுகளாகத் தொடர்ந்து நடைபெற்று வந்துள்ளதும், வீரமணியின் நெருங்கிய தொழில் கூட்டாளிகளுக்காகவும் அந்த பங்களா பயன்படுத்தப்பட்டதும் விசாரணையில் அம்பலமாகியுள்ளது. இதுவரை கிடைத்த தகவல்களின் அடிப்படையில், சுமார் 100-க்கும் மேற்பட்ட சிறுமிகள் மற்றும் இளம்பெண்கள் இந்த குற்ற வலையமைப்பில் பாதிக்கப்பட்டுள்ளதாக வீரமணி வாக்குமூலம் அளித்துள்ளதாகக் கூறப்படுகிறது. இந்த எண்ணிக்கையின் உண்மைத்தன்மையை உறுதி செய்யவும், பாதிக்கப்பட்ட மற்ற பெண்களை அடையாளம் காணவும் காவல்துறையினர் தொடர்ந்து விசாரணையை தீவிரப்படுத்தியுள்ளனர்.

இதற்கிடையே, இவ்வழக்கில் வீரமணியைக் கைது செய்யாமல் மறைக்கவும் வழக்கைத் திசைதிருப்பவும் பல கோடி ரூபாய் கைமாறியுள்ளதாக எழுந்துள்ள குற்றச்சாட்டுகள் பெரும் பரபரப்பை ஏற்படுத்தியுள்ளன. இதனால், பாலியல் குற்ற வழக்கைக் காவல் துறையின் விபச்சாரத் தடுப்புப் பிரிவு விசாரித்து வரும் வேளையில், சந்தேகத்திற்குரிய பணப்பரிவர்த்தனைகளை மட்டும் தனியாக விசாரிக்கக் கூடுதல் ஆணையர் தலைமையில் தனிக்குழு அமைக்கப்பட்டுள்ளது. காவல்துறையினர் உட்பட யாருக்கெல்லாம் லஞ்சப் பணம் சென்று சேர்ந்தது என்பது குறித்து இந்த சிறப்பு குழு பல கோணங்களில் தீவிர விசாரணை மேற்கொண்டு வருகிறது.