“விஜய் – திரிஷா சர்ச்சை: ‘இத நான் சும்மா விடமாட்டேன்’.. நயினாருக்கு எதிராக கொதித்தெழுந்த வானதி சீனிவாசன்…!

நடிகை த்ரிஷா குறித்து தமிழக பாஜக தலைவர் நயினார் நாகேந்திரன் அண்மையில் தெரிவித்த சர்ச்சை கருத்துகளுக்கு, அக்கட்சியின் தேசிய மகளிரணி தலைவரும் எம்.எல்.ஏ-வுமான வானதி சீனிவாசன் தனது வருத்தத்தை பதிவு செய்துள்ளார். கோவையில் நடைபெற்ற நிகழ்ச்சி ஒன்றில் பங்கேற்ற பின் செய்தியாளர்களிடம் பேசிய அவர், எப்போதும் நாகரிகமாகவும் பண்பாகவும் பேசக்கூடிய நயினார் நாகேந்திரன், ஏன் இது போன்ற கருத்தைக் கூறினார் என்று தெரியவில்லை என்றும், இந்த விவகாரம் தனக்கு மிகுந்த வருத்தத்தை அளிப்பதாகவும் வெளிப்படையாகத் தெரிவித்துள்ளார்.

பெண்களின் கண்ணியம் மற்றும் பாதுகாப்பு குறித்து பாஜக எப்போதும் உறுதியான நிலைப்பாட்டைக் கொண்டுள்ளது என்பதைச் சுட்டிக்காட்டிய வானதி சீனிவாசன், நயினார் நாகேந்திரனின் பேச்சு தொடர்பாகத் தனிப்பட்ட முறையில் அவரிடம் தனது கருத்தை முன்வைக்கப் போவதாகவும் கூறினார். அதே சமயம், இந்த விவகாரத்தில் திமுக மற்றும் அதன் கூட்டணிக் கட்சிகள் விமர்சனம் செய்வதற்கு எவ்வித தார்மீக உரிமையும் இல்லை என்று அவர் காட்டமாகப் பதிலடி கொடுத்தார்.

திமுக ஆட்சியில் பெண்கள் மற்றும் பெண் குழந்தைகளுக்குப் பாதுகாப்பு இல்லை என்றும், அக்கட்சியின் மேடைப் பேச்சாளர்கள் பலமுறை பெண்களை ஆபாசமாகவும் இழிவாகவும் பேசியுள்ளதை அவர் நினைவு கூர்ந்தார். சிவாஜி கிருஷ்ணமூர்த்தி போன்றவர்களின் பேச்சுகளை அனுமதிக்கும் திமுக, தற்போது ஒரு சிறிய விஷயத்தை ஊதிப் பெரிதாக்கி அரசியல் நாடகம் ஆடுவதாக அவர் குற்றம் சாட்டினார்.

தமிழக சட்டப்பேரவைத் தேர்தல் நெருங்கி வரும் சூழலில், பெண்களின் வாக்கு வங்கியைப் பெறுவதற்காக திமுக அரசு பல்வேறு அறிவிப்புகளை வெளியிட்டு வருவதாகவும், ஆனால் தமிழகப் பெண்கள் எதனையும் மறக்க மாட்டார்கள் என்றும் அவர் குறிப்பிட்டார். நயினார் நாகேந்திரனின் கருத்தில் உடன்பாடு இல்லை என்றாலும், பெண்களை இழிவுபடுத்தும் கலாச்சாரம் திமுகவில்தான் வேரூன்றி இருப்பதாக வானதி சீனிவாசன் தனது பேட்டியில் அழுத்தமாகத் தெரிவித்துள்ளார்.