“மிகப்பெரிய அரசியல் மோசடி!” – திமுக, அதிமுக பற்றி வைகோ உடைத்த வெடி குண்டு ரகசியம்…. தமிழக அரசியலில் அடுத்த பரபரப்பு….!

மதுரை பாண்டி கோவில் பகுதியில் நடைபெற்ற மதிமுக நிர்வாகியின் இல்லத் திருமண விழாவில் கலந்துகொண்டு மணமக்களை வாழ்த்திய பின்னர், மதிமுக பொதுச்செயலாளர் வைகோ செய்தியாளர்களைச் சந்தித்தார். அப்போது தற்போதைய அரசியல் சூழல், சட்டமன்றத்தில் தமிழக முதல்வர் விஜய்யின் செயல்பாடுகள் மற்றும் திமுக – அதிமுக கூட்டணி குறித்த பல்வேறு விமர்சனங்களுக்கு அவர் மிக ஓப்பங்காகத் தன் கருத்துக்களைப் பகிர்ந்து கொண்டார்.

சமீபத்தில் சட்டமன்றத்தில் தமிழக முதல்வர் விஜய் ஆற்றிய உரை மற்றும் அவருடைய செய்கைகள் குறித்து எழுந்துள்ள விமர்சனங்கள் குறித்து வைகோவிடம் கேட்கப்பட்டது. அதற்குப் பதிலளித்த அவர், “விஜய் தற்போதுதான் முதன்முறையாக முதல்வர் நாற்காலியில் அமர்ந்திருக்கிறார்; அரசியல் அனுபவத்தில் ஆரம்பக் கட்டத்தில் இருக்கும் அவர், இன்னும் சில மாதங்களில் அனைத்தையும் கற்றுத் தேர்ந்து, முழுமையான தெளிவு பெற்றுவிடுவார் என்று நான் நம்புகிறேன்” எனத் தெரிவித்தார். மேலும், சட்டமன்றத்தில் எதிர்க்கட்சிகள் எழுப்பும் விமர்சனங்கள் குறித்தோ அல்லது அதற்கு விஜய் அளித்த பதில்கள் குறித்தோ தான் விரிவாக ‘கமெண்ட்’ அடிக்க விரும்பவில்லை என்றும் அவர் நாசுக்காகக் குறிப்பிட்டார்.

தொடர்ந்து பேசிய வைகோ, ஓட்டு அரசியலைத் தாண்டி மக்கள் நலனுக்காகவும், தமிழ்நாட்டின் வாழ்வாதாரத்திற்காகவும் தொடர்ந்து பாடுபடும் ஒரே கட்சி மதிமுகதான் என்பதைத் திட்டவட்டமாகக் கூறினார். நீதிமன்ற உத்தரவுப்படி தமிழ்நாட்டின் நிலத்தடி நீரைக் காக்கக் கருவேலமரங்களை அகற்றும் பணியில் தங்கள் கட்சியினர் ஈடுபட்டு வருவதைச் சுட்டிக்காட்டிய அவர், இதனால் ஒரு ஓட்டுக்கூட கிடைக்காது என்று தெரிந்தும் தமிழக நலனுக்காகவே இதனைச் செய்வதாகக் குறிப்பிட்டார். மேலும், திமுக கூட்டணி குறித்து ஆ.ராசா வைத்துள்ள விமர்சனங்கள் குறித்துப் பேசுகையில், அரசியல் களத்தில் ஒவ்வொருவருக்கும் ஒரு தனி பாணி உண்டு, அது ஆ.ராசாவின் பாணி எனத் தெரிவித்தார்.

இறுதியாக, அண்மைக்காலமாக அரசியல் வட்டாரத்தில் பரவி வரும் மிக முக்கியமான வதந்தி ஒன்றிற்கு வைகோ மிகக் கடுமையான கண்டனத்தைப் பதிவு செய்தார். “அதிமுக ஆட்சி அமைப்பதற்கு திமுக ஆதரவு கொடுக்க முனைந்ததாகக் கூறப்படும் தகவல் ஒருவேளை உண்மையாக இருக்குமானால், அதைவிட ஒரு மிகப்பெரிய அரசியல் மோசடி இந்த உலகத்தில் வேறு எதுவும் இருக்க முடியாது” என்று மிக ஆவேசமாகத் தெரிவித்தார். வரும் 27ஆம் தேதி மதிமுகவின் பொதுக்குழு கூடவுள்ள நிலையில், அதில் கட்சியின் முக்கியத் தீர்மானங்கள் வடித்தெடுக்கப்படும் என்றும், எத்தனை விமர்சனங்கள் வந்தாலும் தனது மக்கள் பயணம் தொய்வின்றித் தொடரும் என்றும் வைகோ உறுதிபடக் கூறினார்.