“மீண்டும் தேர்தல் வந்தால் விஜய் 180 சீட் ஜெயிப்பார்”…. வைகோ சொன்ன அந்த ஒரு ரகசியம்… தமிழக அரசியலில் திடீர் திருப்பம்..!

தமிழகத்தில் சுற்றுச்சூழல் பாதுகாப்பு மற்றும் மக்கள் நலன் சார்ந்த விவகாரங்களில் தொடர்ந்து குரல் கொடுத்து வரும் மதிமுக பொதுச்செயலாளர் வைகோ, தூத்துக்குடி மாவட்டம் கோவில்பட்டி அருகே உள்ள வில்லிசேரி பகுதிக்கு உட்பட்ட சத்திரப்பட்டியில் சீமை கருவேல மரங்களை அகற்றும் பணியினை முறைப்படி கொடியசைத்து துவக்கி வைத்தார். பல ஆண்டுகளாகச் சீமை கருவேல மரங்களை வேரோடு ஒழிப்பதற்காகச் சட்டப் போராட்டங்களையும், களப் பணிகளையும் முன்னெடுத்து வரும் வைகோ, அதன் தொடர்ச்சியாக எட்டாவது மாவட்டமாக இங்குப் பணிகளைத் துவங்கிய பின் செய்தியாளர்களைச் சந்தித்துப் பேசினார்.

அப்போது தனது கடந்த காலப் போராட்டங்களை நினைவுகூர்ந்த வைகோ, ஸ்டெர்லைட் விவகாரம், முல்லைப் பெரியாறு அணைப் பிரச்சனை மற்றும் நியூட்ரினோ திட்டம் உள்ளிட்ட பல்வேறு மக்கள் நலப் பிரச்சனைகளுக்காகக் கடந்த 20 ஆண்டுகளுக்கும் மேலாகக் கட்சி கொடி இல்லாமல் தொடர்ந்து போராடி வருவதாகக் குறிப்பிட்டார். கேரளா அரசு முல்லைப் பெரியாறு அணையை உடைக்க முற்பட்டபோதும், பிரதமர் நரேந்திர மோடி தமிழகத்தில் நியூட்ரினோ திட்டத்தைச் செயல்படுத்த முயன்றபோதும், கர்நாடகா மேகதாது அணையை எழுப்பத் துணிந்தபோதும் நீதிமன்றங்கள் மூலமும், மக்கள் திரள் போராட்டங்கள் மூலமும் அவற்றை வெற்றிகரமாக முறியடித்துள்ளதாகத் தெரிவித்தார். மேலும், சீமை கருவேல மரங்களை அகற்றும் பணிகளைத் தமிழக அரசு போர்க்கால அடிப்படையில் செய்ய வேண்டும் என்றும் வலியுறுத்தினார்.

தற்போதைய அரசியல் சூழல் குறித்துப் பேசிய அவர், தமிழகத்தில் தலைவிரித்து ஆடிய ‘ஊழல்’ (கரெப்சன்) என்ற மக்களுக்குக் கேடான கொடிய நோயைத் தமிழக வெற்றிக் கழகத்தின் தலைவரும், தமிழக முதலமைச்சருமான ஜோசப் விஜய் அவர்கள் முற்றிலும் நீக்கியுள்ளார் என்பதை யாராலும் மறுக்க முடியாது என்று புகழாரம் சூட்டினார். மேலும், தற்போதைய களச் சூழலும் மக்களின் மனநிலையும் தவெக-விற்குச் சாதகமாகவே இருப்பதாகக் குறிப்பிட்ட அவர், தமிழகத்தில் மீண்டும் ஒருமுறை தேர்தல் நடத்தப்பட்டால் விஜய் அவர்கள் தலைமையிலான கூட்டணி 180-க்கும் மேற்பட்ட இடங்களைக் கைப்பற்றிப் பிரம்மாண்ட வெற்றி பெறுவது உறுதி என்று தீர்க்கமாகக் கூறினார்.

தொடர்ந்து பேசிய வைகோ, முன்னாள் அமைச்சர் செந்தில் பாலாஜி அண்ணா திமுகவில் இருந்த காலம் முதலே அவர் மீது எவ்வளவு ஊழல் புகார்கள் உள்ளன என்பது அனைவருக்கும் தெரிந்த ஒன்றுதான் என்றார். தற்போதைய அரசியல் நகர்வுகளின்படி, தமிழக வெற்றிக் கழகத்தின் (தவெக) தலைமையிலான கூட்டணியில் மதிமுக அதிகாரப்பூர்வமாக இடம்பெற்றுள்ளது என்பதைத் திட்டவட்டமாக உறுதிப்படுத்திய வைகோவின் இந்த அதிரடிப் பேட்டி, தமிழக அரசியல் வட்டாரத்தில் பெரும் பரபரப்பையும் புதிய விவாதங்களையும் கிளப்பியுள்ளது.