“அதை நீங்களே சொல்லிடுங்க வைகோ சார்”…. விஜய் கொடுத்த மாஸ் ஐடியா… உளவுத்துறை கசியவிட்ட உண்மை… அரசியலில் திடீர் திருப்பம்…!

மதிமுக பொதுச்செயலாளர் வைகோவின் நாடாளுமன்ற உரைகள் தொகுக்கப்பட்டு, நூல் வடிவில் வரும் ஆகஸ்ட் 4-ஆம் தேதி டெல்லியில் வெளியிட திட்டமிடப்பட்டுள்ளது. தேசிய அளவிலான பல்வேறு அரசியல் கட்சித் தலைவர்கள், மூத்த வழக்கறிஞர்கள் மற்றும் நாடாளுமன்ற முன்னாள் சபாநாயகர்கள் பங்கேற்கும் இந்நிகழ்வில், மக்களவை எதிர்க்கட்சித் தலைவர் ராகுல் காந்தி நூலை வெளியிட, தமிழக வெற்றிக் கழகத்தின் தலைவர் விஜய் அதைப் பெற்றுக்கொள்வதாக ஆரம்பத்தில் முடிவு செய்யப்பட்டிருந்தது. தேசிய அரசியல் அரங்கில் விஜய்யை ஒரு முக்கிய சக்தியாக முன்னிறுத்தும் நோக்கத்துடன் இந்த டெல்லி விழா மிகப்பெரிய எதிர்பார்ப்புகளுடன் வடிவமைக்கப்பட்டிருந்தது.

எனினும், இந்த டெல்லி விழாவில் விஜய் பங்கேற்பதைத் தவிர்க்குமாறு வைகோ அவரிடம் நேரில் கேட்டுக்கொண்டுள்ளதாகத் தகவல்கள் வெளியாகியுள்ளன. விஜய் வருகை தந்தால் கட்டுக்கடங்காத மக்கள் கூட்டம் கூடும் என்பதாலும், இதனால் பெரும் பாதுகாப்புச் சிக்கல்கள் எழக்கூடும் என்பதாலும் டெல்லி நிகழ்வைத் தவிர்க்குமாறு அறிவுறுத்தப்பட்டுள்ளது. கூட்ட நெரிசலால் ஏதேனும் அசம்பாவிதங்கள் ஏற்பட்டால் அதற்கு முழுப் பொறுப்பேற்க வேண்டி வரும் என்று மத்திய உளவுத்துறை (IB) அதிகாரிகள் வைகோவிடம் எச்சரித்ததே இந்த திடீர் மாற்றத்திற்குக் முக்கியக் காரணமாகக் கூறப்படுகிறது. மேலும், டெல்லி காவல்துறை மத்திய உள்துறை அமைச்சகத்தின் கட்டுப்பாட்டில் இருப்பதால், அங்கு போதிய பாதுகாப்பு ஏற்பாடுகள் கிடைப்பதில் உள்ள நிச்சயமற்ற தன்மையும் இந்த முடிவுக்கு வழிவகுத்துள்ளது.

மறுபுறம், தமிழக மாநில உளவுத்துறையும் விஜய் தரப்பிற்கு இதுகுறித்து உரிய எச்சரிக்கைகளை விடுத்துள்ளதாகத் தெரிகிறது. ஏற்கனவே கரூர் விவகாரம் தொடர்பான சி.பி.ஐ விசாரணையை எதிர்கொண்டு வரும் சூழலில், டெல்லி விழாவில் ஏதேனும் விரும்பத்தகாத சம்பவங்கள் நிகழ்ந்தால் அதற்கான பழி முழுமையாக விஜய் மீதே விழும் என மாநில உளவுத்துறை சுட்டிக்காட்டியுள்ளது. எனவே, இந்த அரசியல் ரிஸ்க்கைத் தவிர்க்கும் வகையில் டெல்லி பயணத்தைக் கைவிடுவதே சிறந்தது என உளவுத்துறை அளித்த ஆலோசனையை விஜய் தரப்பும் தீவிரமாகப் பரிசீலித்துள்ளது.

இதனடிப்படையில் நடைபெற்ற விஜய் – வைகோ இடையிலான சந்திப்பின் போது, இரு தலைவர்களும் சுமுகமான ஒரு முடிவுக்கு வந்துள்ளனர். “டெல்லி நிகழ்ச்சியைத் தவிர்க்குமாறு நீங்களே என்னிடம் கேட்டுக்கொண்டதாக வெளியில் சொல்லி விடுங்கள்” என விஜய் வேண்டுகோள் விடுக்க, வைகோவும் அதற்குச் சம்மதித்து அவ்வாறே செய்தியாளர்களிடம் தெரிவித்துள்ளார். டெல்லி பயணத்தைத் தவிர்க்கும் விஜய், அதற்குப் பதிலாகச் சென்னையில் பிரம்மாண்டமாக நடைபெறவுள்ள இந்த நூலின் தமிழ் பதிப்பு வெளியீட்டு விழாவில் சிறப்பு விருந்தினராகக் கலந்துகொள்வார் என எதிர்பார்க்கப்படுகிறது.