நான் கீழ விழுந்து கிடக்கும்போது நாகேஷ் வந்து அடிச்ச கமெண்ட்… நானே சிரிச்சிட்டேன் – வாலி பகிர்ந்த சுவாரஸ்ய தருணம்!

தமிழ் சினிமாவில் தன்னுடைய வித்தியாசமான உடல்மொழி மற்றும் நகைச்சுவை தெறிக்கும் வசனங்கள் மூலமாகக் கலக்கியவர் நாகேஷ். 20 ஆண்டுகளுக்கு மேலாக இவர் தமிழ் சினிமாவில் முன்னணி நகைச்சுவை நடிகராக வலம் வந்தார். அவரை தமிழ் சினிமாவின் சார்லி சாப்ளின் என்றும் சொல்வர். கவுண்டமணி வருகைக்குப் பிறகும் பல படங்களில் நகைச்சுவை, வில்லன் மற்றும் குணச்சித்திர வேடங்களில் நடித்தார்.

அவர் தன்னுடைய மார்க்கெட்டின் உச்சத்தில் இருந்த போது கிட்டத்தட்ட அனைத்து தமிழ் படங்களிலும் நடித்தார். ஒரு நாளைக்கு ஷிஃப்ட் கணக்கில் ஐந்து படங்களில் கூட நடித்துள்ளார். இதனால் எந்த பட ஷூட்டிங்குக்கும் அவரால் சொன்ன நேரத்தில் செல்ல முடியாதாம். அதனால் அவர் வர தாமதமானால் எம் ஜி ஆர், சிவாஜி கூட அவருக்காக காத்திருக்க வேண்டிய சூழல் உருவானதாம்.

நகைச்சுவை நடிகர் என்பதால் நாகேஷ் வெறும் காமெடியில் மட்டுமே கலக்குவார் என்று சொல்ல முடியாது. ஏனென்றால் அவர் சர்வர் சுந்தரம் மற்றும் எதிர்நீச்சல் ஆகிய படங்களில் எமோஷனல் வேடங்களில் கலக்கி இருப்பார். நாகேஷ் திரையில் மட்டும் அசாத்திய நகைச்சுவைத் திறன் கொண்டவர் இல்லை. நிஜ வாழ்க்கையிலும் அதே அளவுக்கு நகைச்சுவை உணர்வு கொண்டவர்.

இதுபற்றி நாகேஷுடன் சில ஆண்டுகள் ஒன்றாக அறைத் தோழனாக இருந்த வாலி அவர்கள் ஒரு சுவாரஸ்யமான தருணத்தைப் பகிர்ந்துள்ளார். அதில் “நான் ஒரு தடவை பாத்ரூம் போயிட்டு திரும்பி அறைக்கு வரும்போது தண்ணீரில் கால் வைத்து வழுக்கி விழுந்துவிட்டேன். எழுந்திருக்க முடியாமல் படுத்தே இருந்தேன். அப்போது அங்கே வந்த நாகேஷ் என்னை பார்த்து “ஏன்டா ரூம்ல அவ்ளோ எடம் இருக்கு? அங்க எல்லாம் படுக்காமல் இங்க வந்து படுத்திருக்க” என்றான். அந்த வலியில் கூட எனக்கு சிரிப்பு வந்துவிட்டது. அப்படி அசாத்தியமான நகைச்சுவை உணர்வு கொண்டவன் அவன்” எனக் கூறியுள்ளார்.