கடுமையான அதிகாரிகள்… நச்சரிக்கும் விற்பனையாளர்கள்… வெளிநாட்டவரை முகம் சுளிக்க வைத்த டெல்லி ஏர்போர்ட்… அமெரிக்கர் வெளியிட்ட அதிர்ச்சி வீடியோ…!!

டெல்லி விமான நிலையத்தின் குடிவரவு மற்றும் டியூட்டி-ஃப்ரீ கடைகள் குறித்து, அமெரிக்காவைச் சேர்ந்த டாமன் சும்ப்ரோகல் என்ற கட்டிடக் கலைஞர் விமர்சித்து வெளியிட்ட வீடியோ ஒன்று சமூக வலைத்தளங்களில் தற்போது வைரலாகி வருகிறது. இந்தியாவிற்கு வரும் வெளிநாட்டுப் பயணிகளிடம் குடிவரவு அதிகாரிகள் மிகவும் கடுமையாக நடந்து கொள்வதாகவும், அந்த சோதனையை முடித்து சில அடிகள் எடுத்து வைப்பதற்குள் டியூட்டி-ஃப்ரீ கடைகளில் உள்ள விற்பனையாளர்கள் பொருட்களை வாங்கச் சொல்லி பயணிகளைத் தொந்தரவு செய்வதாகவும் அவர் அதிருப்தி தெரிவித்துள்ளார். ஒரு நாட்டிற்குள் நுழையும் பயணிகளுக்கு இது ஒரு மோசமான முதல் அனுபவத்தைத் தருவதாகவும் அந்த வீடியோவில் அவர் சுட்டிக்காட்டியுள்ளார்.

இந்த வீடியோவை தனது சமூக வலைத்தளப் பக்கத்தில் பகிர்ந்த பிரபல தொழிலதிபர் ஹர்ஷ் கோயங்கா, டாமனின் கருத்தை ஆமோதித்துள்ளார். விமான நிலையங்களில் பயணிகளிடம் விற்பனையாளர்கள் ஆக்ரோஷமாகப் பொருட்களை விற்க முயற்சிப்பதைச் சுட்டிக்காட்டிய அவர், பயணிகளுக்கு அமைதியான மற்றும் கண்ணியமான வரவேற்பை வழங்க வேண்டும் எனக் கூறி சிவில் விமான போக்குவரத்துத்துறை அமைச்சரையும் டேக் செய்துள்ளார். இணையவாசிகள் மத்தியில் இந்த விவகாரம் இருவேறு கருத்துகளைப் பெற்றுள்ளது. சிலர் உலகெங்கிலும் உள்ள சர்வதேச விமான நிலையங்களில் இந்த விற்பனை முறை வழக்கமான ஒன்றுதான் என்று கூறினாலும், கடந்த 30 ஆண்டுகளாகத் தான் பல நாடுகளுக்குப் பயணித்திருப்பதாகவும், டெல்லியைப் போல இவ்வளவு நெரிசலான மற்றும் குழப்பமான ஒரு சூழலை வேறெங்கும் பார்த்ததில்லை எனவும் டாமன் பதிலளித்துள்ளார்.