“அமெரிக்கா சொன்ன 20 வருஷம்… ஈரான் சொன்ன 5 வருஷம்”… இடையில் சிக்கிய ‘யுரேனியம்’….ஹார்முஸ் நீரிணையில் காத்திருக்கும் பேராபத்து….!

இஸ்லாமாபாத்தில் நடைபெற்ற முதற்கட்டப் பேச்சுவார்த்தை தோல்வியில் முடிந்ததைத் தொடர்ந்து, வளைகுடா பிராந்தியத்தில் பதற்றம் அதிகரித்துள்ளது. இருப்பினும், உலக நாடுகளின் கவலையைப் போக்கும் விதமாக, இரு நாடுகளும் அடுத்தகட்ட பேச்சுவார்த்தைக்குத் தயாராகிவிட்டதாகத் தகவல்கள் வெளியாகியுள்ளன. வரும் ஏப்ரல் 16-ஆம் தேதி இந்த முக்கிய சந்திப்பு நடைபெற வாய்ப்புள்ள நிலையில், இரு நாட்டுப் பிரதிநிதிகளும் நேரடியாக ஒரே அறையில் அமர்ந்து பேசி சுமுக முடிவெடுக்கத் திட்டமிட்டுள்ளனர்.

தற்போதுள்ள தற்காலிகப் போர் நிறுத்தம் ஏப்ரல் 21-ஆம் தேதியுடன் முடிவுக்கு வருவதால், அதற்குள் ஒரு நிரந்தர உடன்பாட்டை எட்ட வேண்டிய கட்டாயம் ஏற்பட்டுள்ளது. ஒருவேளை பேச்சுவார்த்தை வெற்றிபெறவில்லை என்றால், மீண்டும் ஏவுகணைத் தாக்குதல்கள் தொடங்கிவிடும் என்ற அச்சம் உலக நாடுகளிடையே நிலவுகிறது. குறிப்பாக, உலக எரிசக்தி போக்குவரத்தின் இதயமாகத் திகழும் ஹார்முஸ் நீரிணைப் பகுதியில் பதற்றம் நீடிப்பது உலகப் பொருளாதாரத்திற்கே பெரும் அச்சுறுத்தலாக மாறியுள்ளது.

பாகிஸ்தான், எகிப்து மற்றும் துருக்கி ஆகிய நாடுகள் இந்த ‘அமைதித் தூது’ முயற்சியில் தீவிரமாக இறங்கியுள்ளன. முதல் ரவுண்டில் அமெரிக்கத் துணை அதிபர் ஜே.டி. வேன்ஸ் உடன்பாடு இன்றி வெளியேறினாலும், போர் நிறுத்தத்தின் அவசியத்தை உணர்ந்து மீண்டும் பேச்சுவார்த்தைக்குச் சம்மதம் தெரிவிக்கப்பட்டுள்ளது. இந்தப் பேச்சுவார்த்தை மீண்டும் இஸ்லாமாபாத்திலேயே நடக்க வாய்ப்புள்ளது; ஒருவேளை அமெரிக்கா மாற்றுக் கருத்தை முன்வைத்தால் சுவிட்சர்லாந்தின் ஜெனீவா நகருக்கு இது மாற்றப்படலாம்.

தற்போதைய முட்டுக்கட்டைக்கு முக்கிய காரணமாக இருப்பது யுரேனியம் செறிவூட்டல் விவகாரமே ஆகும். யுரேனியம் செறிவூட்டலை 20 ஆண்டுகளுக்கு நிறுத்தி வைக்க வேண்டும் என அமெரிக்கா பிடிவாதம் காட்டும் நிலையில், ஈரான் அதனை 5 ஆண்டுகள் மட்டுமே ஏற்க முடியும் எனத் திட்டவட்டமாகக் கூறியுள்ளது. இந்த கால அவகாசத்தில் நிலவும் கருத்து வேறுபாடுகளைக் களைந்து, ஒரு நிரந்தரப் போர் நிறுத்த ஒப்பந்தம் எட்டப்படுமா என்பதே இப்போது உலக நாடுகளின் எதிர்பார்ப்பாக உள்ளது.