ரஷ்யா கொடுத்த ‘ஐடியா’.. காஸ்பியன் கடல் வழியாக தப்பிக்க நினைத்த ஈரானுக்கு காத்திருந்த அதிர்ச்சி… பதறவைக்கும் பின்னணி…!

அமெரிக்க கடற்படையின் அதிரடி நடவடிக்கையால் ஈரான் துறைமுகங்கள் முடக்கப்பட்டுள்ள நிலையில், அந்நாடு முன்னெப்போதும் இல்லாத அளவிலான உணவுப் பாதுகாப்பு அச்சுறுத்தலை எதிர்கொண்டுள்ளது. ஹார்முஸ் நீரிணைப் பகுதியில் அமெரிக்கப் படைகளின் வருகையைத் தொடர்ந்து, சுமார் 9.83 லட்சம் டன் உணவுப் பொருட்கள் ஈரானிய துறைமுகங்களில் இறக்கப்பட முடியாமல் முடங்கிக் கிடக்கின்றன. போர் பதற்றங்களுக்கு மத்தியில், கடல்வழி சரக்கு போக்குவரத்து முழுமையாக ஸ்தம்பித்துள்ளதால், நாட்டின் அத்தியாவசியத் தேவைகளுக்கான விநியோகச் சங்கிலி முற்றிலுமாகத் துண்டிக்கப்பட்டு, பெரும் பற்றாக்குறை ஏற்படும் அபாயம் உருவாகியுள்ளது.

ஏற்கனவே பொருளாதார நெருக்கடியில் சிக்கியுள்ள ஈரானில், இந்த வர்த்தகத் தடை உணவுப் பொருட்களின் விலையை விண்ணைத் தொடச் செய்துள்ளது. கடந்த ஓராண்டில் அரிசி விலை ஏழு மடங்கும், சமையல் எண்ணெய் விலை மூன்று மடங்கும் அதிகரித்துள்ள நிலையில், பிப்ரவரி மாதத்திற்குப் பிறகு உணவுகளின் விலை மேலும் 40 சதவீதம் உயர்ந்துள்ளதாகத் தகவல்கள் தெரிவிக்கின்றன. 47.5 சதவீதப் பணவீக்கம் மற்றும் ரியால் நாணயத்தின் மதிப்பு வீழ்ச்சியால், சாமானிய மக்களின் வாங்கும் சக்தி முற்றிலுமாகச் சரிந்து, மக்கள் அன்றாட உணவிற்கே திண்டாடும் நிலைக்குத் தள்ளப்பட்டுள்ளனர்.

ஈரான் தனது உணவுத் தேவையில் 70 சதவீதத்தை உள்நாட்டிலேயே உற்பத்தி செய்தாலும், அரிசி, சோளம் மற்றும் சமையல் எண்ணெய் போன்ற அத்தியாவசியப் பொருட்களுக்கு முறையே 77%, 89% மற்றும் 91% இறக்குமதியையே சார்ந்துள்ளது. இந்த நெருக்கடியைச் சமாளிக்க ரஷ்யாவிடமிருந்து காஸ்பியன் கடல் வழியாகத் தானியங்களை இறக்குமதி செய்ய ஈரான் முயற்சித்தாலும், அந்த வழித்தடத்தின் ஆழமற்ற தன்மை மற்றும் புவியியல் அமைப்பால் பெர்சிய வளைகுடா அளவிற்குப் பெரிய அளவிலான வர்த்தகத்தைக் கையாள முடியாது. இதனால் மாற்று வழிகளும் ஈரானுக்குப் பெரிய அளவில் கைகொடுக்கவில்லை.

முன்னதாக ஹார்முஸ் நீரிணையை ஈரான் முடக்கியதால், உலகளாவிய உரப் போக்குவரத்தில் 25-30 சதவீதப் பாதிப்பு ஏற்பட்டு, சர்வதேச அளவில் உணவு விலை உயரும் அபாயம் நிலவியது. ஆனால், தற்போது அமெரிக்கக் கடற்படையின் பதில் நடவடிக்கையால் அந்த நெருக்கடி ஈரானை நோக்கியே திரும்பியுள்ளது. பயிரிடும் காலத்தில் உரத் தட்டுப்பாடு மற்றும் இறக்குமதித் தடையால் 2026 மற்றும் 2027-ஆம் ஆண்டுகளில் உலகளாவிய மற்றும் உள்ளூர் உணவுச் சந்தையில் பெரும் பொருளாதாரத் தாக்கங்கள் ஏற்படும் என்று கணிக்கப்பட்டுள்ளது.