“ஒரு குடம் தண்ணீருக்கு இத்தனை நாட்களா?”.. ஹைதராபாத்தை உலுக்கும் வரலாறு காணாத குடிநீர் பஞ்சம்.. என்ன நடக்கிறது அங்கே?.. ஆடிப்போன மக்கள்..!!

தெலுங்கானா மாநிலம் ஹைதராபாத்தில் கோடைகாலம் முடிந்த பின்னரும் வெயிலின் தாக்கம் குறையாத நிலையில், தற்போது கடுமையான குடிநீர் பற்றாக்குறை ஏற்பட்டுள்ளது. பருவமழை தாமதம் மற்றும் நிலத்தடி நீர்மட்டம் வரலாறு காணாத அளவிற்கு சரிந்ததன் காரணமாக, நகரின் பெரும்பாலான ஆழ்துளைக் கிணறுகள் முற்றிலும் வற்றிவிட்டன. இதனால், உள்ளாட்சி அமைப்புகள் மூலம் 4 முதல் 5 நாட்களுக்கு ஒருமுறை மட்டுமே குடிநீர் விநியோகம் செய்யப்படுகிறது. குறிப்பாக ஹைதராபாத்தின் மேற்குப் பகுதிகள் மிக மோசமாகப் பாதிக்கப்பட்டுள்ளதால், பொதுமக்கள் தங்களின் அன்றாடத் தேவைகளுக்காகத் தண்ணீரை மிகவும் சிக்கனமாகப் பயன்படுத்த வேண்டிய கட்டாயத்திற்குத் தள்ளப்பட்டுள்ளனர்.

நகரின் முஷீராபாத், ரசூல்புரா போன்ற பகுதிகளில் வசிக்கும் பொதுமக்கள், லாரிகள் மூலம் வரும் தண்ணீரை மணிக்கணக்கில் காத்திருந்து பெற்று வருகின்றனர். பற்றாக்குறை ஒருபுறமிருக்க, சில இடங்களில் குழாய்களில் அசுத்தமான நீர் விநியோகிக்கப்படுவதால் சுகாதாரச் சீர்கேடு ஏற்படுமோ என்ற அச்சமும் மக்களிடையே எழுந்துள்ளது. நிலத்தடி நீர் வற்றியதால் பொதுமக்கள் அரசு மற்றும் தனியார் தண்ணீர் டேங்கர்களை அதிகளவில் நாடத் தொடங்கியுள்ளனர். இதன் விளைவாக, கடந்த மே மாத இறுதியில் 15,000 ஆக இருந்த தினசரி டேங்கர் முன்பதிவுகளின் எண்ணிக்கை, தற்போது 20,000-ஐத் தொட்டுள்ளது.

இதுகுறித்து ஹைதராபாத் மாநகர குடிநீர் வழங்கல் மற்றும் கழிவுநீர் வடிகால் வாரியத்தின் (HMWS&SB) நிர்வாக இயக்குநர் கே. அசோக் ரெட்டி கூறுகையில், கடந்த 4-5 ஆண்டுகளாக வற்றாமல் இருந்த ஆழ்துளைக் கிணறுகள் கூட இந்த ஆண்டு காய்ந்துவிட்டதே இந்தத் திடீர் நெருக்கடிக்குக் காரணம் என்று தெரிவித்துள்ளார். வழக்கமாக ஒரு நாளைக்கு 1,500 முதல் 2,000 ஆக இருக்கும் முன்பதிவு, தற்போது 20,000 ஆக உயர்ந்திருப்பது வரலாற்றில் இதுவே முதல்முறை என்றும் அவர் குறிப்பிட்டுள்ளார். இந்த நிலைமையைக் கட்டுக்குள் கொண்டுவர அதிகாரிகள் தற்போது இரவு நேரங்களையும் சேர்த்து 3 ஷிப்டுகளாகத் தண்ணீர் விநியோகம் செய்து வருகின்றனர். வரும் நாட்களில் பருவமழை பெய்தால் மட்டுமே ஹைதராபாத் இந்த இக்கட்டான சூழலில் இருந்து மீள முடியும் என அஞ்சப்படுகிறது.