“அந்த 4.5 மணி நேர ரகசியக் கூட்டம்”… டெல்லி எடுத்த அதிரடி முடிவால் அதிர்ச்சியில் தமிழக பாஜக பிரமுகர்…. பொறுத்தது போதும் என பொங்கிய பிரதமர் மோடி…!

பிரதமர் நரேந்திர மோடி தலைமையிலான மத்திய அமைச்சரவை விரைவில் மாற்றம் செய்யப்பட உள்ளதாகத் தகவல்கள் வெளியாகியுள்ளன. ஜூன் அல்லது ஜூலை மாதத்தில் இந்த மாற்றம் நிகழக்கூடும் என எதிர்பார்க்கப்படும் நிலையில், தமிழகத்தைச் சேர்ந்த மத்திய இணையமைச்சர் எல்.முருகனின் பதவி பறிக்கப்படலாம் (கல்தா) என்ற பரபரப்பு தகவல் அரசியல் வட்டாரத்தில் தீயாய் பரவி வருகிறது. அண்மையில் 5 நாடுகளின் அரசுமுறைப் பயணத்தை முடித்துவிட்டு தாயகம் திரும்பிய பிரதமர் மோடி, நடத்திய நான்கரை மணி நேர அவசர அமைச்சரவைக் கூட்டத்தில் அமைச்சர்களின் செயல்பாடுகள் குறித்து தீவிரமாக ஆராய்ந்த பிறகே இந்த அதிரடி முடிவு எடுக்கப்பட்டதாகக் கூறப்படுகிறது.

இந்த அமைச்சரவை மாற்றத்தின் பின்னணியில் அடுத்த ஆண்டு நடைபெறவிருக்கும் உத்தரப் பிரதேசம், குஜராத், கோவா மற்றும் பஞ்சாப் ஆகிய 4 மாநிலங்களின் சட்டசபைத் தேர்தல்கள் முக்கியக் காரணியாக அமைந்துள்ளன. இதில் உ.பி, குஜராத், கோவா ஆகிய மாநிலங்களில் ஆட்சியைத் தக்கவைக்கவும், ஆம் ஆத்மி ஆளும் பஞ்சாபில் தங்களின் செல்வாக்கை நிரூபிக்கவும் பாஜக திட்டமிட்டுள்ளது. இதற்காகத் தேர்தல் நடக்கவுள்ள மாநிலங்களுக்கு அமைச்சரவையில் கூடுதல் பிரதிநிதித்துவம் வழங்க பிரதமர் மோடி முடிவு செய்துள்ளதே இந்த அவசர மாற்றத்திற்கு முதன்மைக் காரணமாகப் பார்க்கப்படுகிறது.

தமிழக பாஜகவின் முன்னாள் தலைவரான எல்.முருகன், அருந்ததியர் சமுதாயத்தைச் சேர்ந்த முதல் மத்திய அமைச்சர் என்ற பெருமையுடன் 2021 முதல் தகவல் ஒளிபரப்பு மற்றும் நாடாளுமன்ற விவகாரங்கள் துறையின் இணையமைச்சராகப் பதவி வகித்து வருகிறார். இவர் மூலமாகத் தமிழகத்தில் பாஜகவை வலுப்படுத்த மேலிடம் திட்டமிட்டது. ஆனால், கடந்த 2011 ராசிபுரம், 2012 சங்கரன்கோவில் இடைத்தேர்தல், 2021 தாராபுரம், அண்மைய அவிநாசி சட்டசபைத் தேர்தல் மற்றும் 2024 நீலகிரி நாடாளுமன்றத் தேர்தல் என தொடர்ந்து 5 தேர்தல்களில் அவர் தோல்வியைத் தழுவியுள்ளார். இந்தத் தொடர் தோல்விகளே தற்போது அவரது அமைச்சர் பதவிக்கு ஆபத்தாக முடிந்துள்ளன.

மறுபுறம், கட்சி தொடங்கிய இரண்டே ஆண்டுகளில் நடிகர் விஜய் தமிழகத்தின் முதலமைச்சராக அரியணை ஏறியிருப்பது மாநில அரசியலில் பெரும் மாற்றத்தை ஏற்படுத்தியுள்ளது. திமுக, அதிமுக ஆகிய கட்சிகள் படுதோல்வியைச் சந்தித்துள்ள சூழலில், அதிமுக கூட்டணியில் 28 இடங்களில் போட்டியிட்ட பாஜகவால் ஒரே ஒரு இடத்தில் மட்டுமே வெற்றி பெற முடிந்தது. எல்.முருகன், வானதி சீனிவாசன், நயினார் நாகேந்திரன் போன்ற முக்கியத் தலைவர்கள் தோற்றதால், தமிழகத்தில் பாஜகவை உயிர்ப்புடன் வைத்திருக்க இளம் தலைவர்களுக்கு முக்கியத்துவம் தர டெல்லி மேலிடம் விரும்புகிறது. இதன் காரணமாகவே, மாநிலத் தலைவர் முதல் மாவட்டத் தலைவர்கள் வரை மாற்றப்பட உள்ளதோடு, எல்.முருகனுக்குப் பதிலாகத் தமிழகத்தைச் சேர்ந்த ஓர் இளம் தலைவருக்கு மத்திய அமைச்சர் பதவி வழங்க தீவிர ஆலோசனைகள் நடந்து வருகின்றன.