“வெளியே கால் வச்சா உடம்பே பொசுங்கிடும்”…. 50 டிகிரி நெருங்கும் நெருப்பு வெயில்… துபாய் மக்களின் தற்போதைய பகீர் நிலைமை…. வளைகுடா நாடுகள் சந்திக்கப் போகும் அடுத்த ஆபத்து….!

ஐக்கிய அரபு அமீரகத்தில் இந்த ஆண்டு கோடைக் காலம் அதன் உக்கிரமான முகத்தைக் காட்டத் தொடங்கியுள்ளது. கடந்த ஜூன் 20 சனிக்கிழமையன்று, அல் அய்ன் பகுதியில் உள்ள சுவைஹான் என்ற இடத்தில் நாட்டின் அதிகபட்ச வெப்பநிலையாக 49.4 டிகிரி செல்சியஸ் (122 டிகிரி ஃபாரன்ஹீட்) பதிவாகி மக்களை நிலைகுலையச் செய்துள்ளது. கடந்த ஏப்ரல் மாதத்தில் 35 முதல் 42 டிகிரி செல்சியஸாக இருந்த வெப்பநிலை, வெறும் இரண்டு மாத இடைவெளியில் 50 டிகிரியை நெருங்கும் அளவுக்குத் தாறுமாறாக உயர்ந்துள்ளது பொதுமக்களிடையே பெரும் கவலையை ஏற்படுத்தியுள்ளது.

இந்த அதீத வெப்ப அலையின் காரணமாக அமீரக மக்களின் இயல்பு வாழ்க்கை கடுமையாகப் பாதிக்கப்பட்டுள்ளது. மதிய வேளைகளில் வெளியே கால் வைக்க முடியாத அளவுக்கு அனல் காற்று வீசுவதால், அத்தியாவசியத் தேவைகளுக்குக் கூட மக்கள் வெளியே செல்ல அஞ்சுகின்றனர். வழக்கமாக வெப்பத்தைத் தணிக்கப் பயன்படும் நீச்சல் குளங்கள் கூட, கொதிக்கும் வெயிலால் சூடாகி குளிக்க முடியாத நிலைக்கு மாறியுள்ளதாகப் பொதுமக்கள் புலம்புகின்றனர். இதனால், பெரும்பாலான மக்கள் பகல் நேரப் பயணங்களைத் தவிர்த்துவிட்டு, மாலை மற்றும் இரவு நேரங்களில் மட்டுமே வெளியே வரத் தொடங்கியுள்ளனர்.

இந்த வரலாறு காணாத வெப்ப உயர்வுக்கு உலகளாவிய ரீதியில் பேசப்படும் ‘எல் நினோ’ காலநிலை மாற்றமே முக்கியக் காரணம் என்று அந்நாட்டின் தேசிய வானிலை ஆய்வு மையம் எச்சரித்துள்ளது. பசிபிக் பெருங்கடலின் வெப்பமண்டலப் பகுதியில் கடல் நீர் வழக்கத்திற்கு மாறாக வெப்பமடைவதால் ஏற்படும் இந்த இயற்கை நிகழ்வு, உலகெங்கிலும் உள்ள வானிலையை மாற்றியமைக்கும் திறன் கொண்டது. இதன் விளைவாக, ஐக்கிய அமீரகம் மற்றும் வளைகுடா பிராந்தியத்தில் முன்னெப்போதையும் விட மிக அதிக வெப்பமும், புழுக்கமும் (ஈரப்பதம்) உருவாகி நிலைமையை மேலும் மோசமாக்கியுள்ளது.

ஏற்கனவே கடந்த 2024ஆம் ஆண்டு, உலக வரலாற்றிலேயே மிக வெப்பமான ஆண்டாகப் பதிவாகியிருந்த நிலையில், அதன் தொடர்ச்சியாக நடப்பு ஆண்டிலும் வெப்பம் மேலும் அதிகரிக்கும் என்று வானிலை நிபுணர்கள் கணித்துள்ளனர். வறட்சி மற்றும் கடுமையான வெப்ப அலைகளை உருவாக்கும் இந்த எல் நினோ தாக்கம் இன்னும் சில மாதங்களுக்கு நீடிக்கக்கூடும் என்பதால், அமீரக மக்கள் தகுந்த பாதுகாப்பு நடவடிக்கைகளை மேற்கொள்ள வேண்டியது அவசியமாகிறது. பகல் நேரங்களில் உடலை நீரேற்றத்துடன் வைத்திருப்பது மற்றும் தேவையின்றி வெயிலில் செல்வதைத் தவிர்ப்பதே தற்போதைய சூழலில் இதிலிருந்து தப்பிப்பதற்கான வழிகளாகும்.