ஐயோ கடவுளே… தண்ணீர் தொட்டிக்குள் மூழ்கி… 2 சிறுமிகள் துடிதுடித்து உயிரிழப்பு… நாசிக்கில் நடந்த நெஞ்சைப் பிளக்கும் சோகம்…!

நாசிக் மானேநகர் பகுதியில் வசித்து வந்த மருத்துவர் விஷால் சோனாவனே என்பவரின் மகள்களான திருப்தி (8) மற்றும் ஸ்வஸ்தி (6) ஆகிய இரு சிறுமிகள், சனிக்கிழமை மாலையில் வீட்டில் விளையாடிக் கொண்டிருந்தபோது தற்செயலாகத் தண்ணீர் தொட்டிக்குள் விழுந்து உயிரிழந்தனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.

சம்பவத்தன்று பெற்றோர் இருவரும் அருகில் உள்ள தங்களது மருத்துவமனையில் நோயாளிகளுக்குச் சிகிச்சை அளித்துக்கொண்டிருந்தனர். தந்தை விஷால் வீட்டிற்கு வந்து குழந்தைகளுக்கு உணவளித்துவிட்டு, சமையலறை கதவைத் திறந்து வைத்து வீட்டை வெளியே பூட்டிவிட்டுச் சென்றுள்ளார். பின்னர் வந்து பார்த்தபோது குழந்தைகள் காணாததால் தேடியுள்ளார். அப்போது சமையலறை அருகில் இருந்த தண்ணீர் தொட்டியின் மூடி திறந்திருப்பதை கவனித்து உள்ளே பார்த்தபோது, சிறுமிகள் தொட்டிக்குள் விழுந்து கிடந்தது தெரியவந்தது.

உடனடியாக அண்டை வீட்டாரின் உதவியுடன் மீட்கப்பட்ட இரு சிறுமிகளும் இரவு 10:35 மணியளவில் அருகில் உள்ள தனியார் மருத்துவமனைக்குக் கொண்டு செல்லப்பட்டனர். இருப்பினும், சிகிச்சை பலனின்றி இரவு 11:10 மணியளவில் குழந்தைகள் உயிரிழந்ததாக மருத்துவர்கள் தெரிவித்தனர். இச்சம்பவம் குறித்து காவல்துறையினர் வழக்குப்பதிவு செய்து விசாரணை நடத்தி வருகின்றனர். திறந்தவெளி தண்ணீர் தொட்டிகள், பால்கனிகள் மற்றும் மொட்டை மாடிகள் சிறு குழந்தைகளுக்கு எவ்வளவு அபாயகரமானவை என்பதை இந்தச் சம்பவம் உணர்த்துகிறது.