“என்னிடம் 100 ஆடியோ ஆதாரங்கள் இருக்கு”…. விஜய்க்கு எதிராக மதுரையில் கொதித்தெழுந்த நிர்வாகி…. தவெகவில் வெடித்த அடுத்தடுத்த பரபரப்பு….!

தமிழக வெற்றிக் கழகத்தில் கட்சிப் பதவிகளை வழங்குவதற்காகப் பணம் பெறப்படுவதாகக் கூறப்படும் குற்றச்சாட்டுகள் மதுரை அரசியல் வட்டாரத்தில் பெரும் அதிர்வலைகளை ஏற்படுத்தியுள்ளன. புதிதாக உருவாக்கப்பட்ட மதுரை மத்திய மாவட்டத்திற்கான நிர்வாகிகளை நியமிக்கும் பணிகள் தீவிரமாக நடைபெற்று வரும் சூழலில், பதவிகளுக்கு பல லட்சம் ரூபாய் பேரம் பேசப்படுவதாகத் தொடர் குற்றச்சாட்டுகள் எழுந்துள்ளன. மதுரை மத்திய தொகுதி எம்.எல்.ஏ முஸ்தபாவின் உதவியாளர் கனி என்பவர் ரூ.15 லட்சம் கேட்பது போன்ற முதல் ஆடியோ வெளியானதைத் தொடர்ந்து, தற்பொழுது ஜோயல் என்பவரின் இரண்டாவது ஆடியோவும் வெளியாகி சர்ச்சையைக் கூட்டியுள்ளது.

வெளியான இரண்டாவது ஆடியோவில், மதுரையைச் சேர்ந்த ஜோயல் என்பவர் பணம் கொடுத்துப் பதவி வாங்கும் கலாச்சாரம் வெட்கக்கேடானது என்று கடுமையாகச் சாடியுள்ளார். இந்த விவகாரத்தில் எம்.எல்.ஏ முஸ்தபாவிற்கு நேரடித் தொடர்பு இருப்பதாகவும், இது குறித்து ஆரம்பத்திலேயே அவர் உரிய எச்சரிக்கை விடுத்திருக்க வேண்டும் என்றும் அவர் குறிப்பிட்டுள்ளார். மேலும், பணம் கைமாறியது தொடர்பான ஏராளமான ஆதாரங்கள் மற்றும் ஆடியோ பதிவுகள் தன்வசம் இருப்பதாகவும், தேவைப்பட்டால் அவற்றைச் கட்சித் தலைவர் விஜயிடமும், காவல் ஆணையரிடமும் ஒப்படைக்கத் தயார் என்றும் அவர் எச்சரித்துள்ளார்.

ஊழலை ஒழிக்கும் உன்னத நோக்கத்துடனே அரசியலுக்கு வந்ததாகக் கூறும் கட்சியின் தலைவர் விஜய்யின் கொள்கைகளுக்கு இத்தகைய புகார்கள் முரணாக உள்ளதாகக் கட்சியினர் மற்றும் பொதுமக்கள் மத்தியில் கேள்விகள் எழுந்துள்ளன. தவெகவின் அடிமட்ட வளர்ச்சிக்கும், நற்பெயருக்கும் களங்கம் விளைவிக்கும் இந்தச் செயல்கள் குறித்துக் கட்சித் தலைமை உடனடியாகத் தலையிட்டுத் தகுந்த விசாரணை நடத்த வேண்டும் என்ற கோரிக்கை வலுத்து வருகிறது. அடுத்தடுத்து வெளிவந்துகொண்டிருக்கும் இந்த ஆடியோ பதிவுகள் தவெக கட்சிக்குள் பெரும் சலசலப்பை ஏற்படுத்தியுள்ளதுடன், தலைமை என்ன மாதிரியான ஒழுங்கு நடவடிக்கைகளை எடுக்கப் போகிறது என்ற எதிர்பார்ப்பையும் ஏற்படுத்தியுள்ளது.