பேரறிஞர் அண்ணாவின் அறிவுப்பூர்வமான வாதங்கள், முத்தமிழறிஞர் கலைஞரின் அடுக்குமொழி வசீகரங்கள், வைகோவின் அனல் பறக்கும் மேடைப்பேச்சுகள் எனப் பேசிப் பேசியே வளர்ந்த திராவிட அரசியல் பாரம்பரியத்தைத் தனது ஒற்றை முகத்தால் வென்றவர் எம்.ஜி.ஆர். அவருக்குப் பின் ஜெயலலிதாவும் அதே பாணியைத் தொடர்ந்தார். ஆனால், தமிழக அரசியல் வரலாற்றின் இந்த அறுபதாண்டு கால மரபை, 2026 சட்டமன்றத் தேர்தலில் முற்றிலுமாக மாற்றியமைத்தது தமிழக வெற்றிக் கழகம். போஸ்டர்கள், பொதுக்கூட்டங்கள் போன்ற மரபுவழிப் பிரச்சாரங்களை விட, மக்களின் மொபைல் திரைகளில் சில நொடிகளில் கடந்துபோகும் ‘ரீல்ஸ்’, ‘ஷார்ட்ஸ்’ போன்ற டிஜிட்டல் உத்திகளைத் திறம்பட கையாண்டு, இளைஞர்களின் பேராதரவோடு தவெக ஆட்சிக் கட்டிலில் அமர்ந்தது.
இருப்பினும், அன்று எதிர்க்கட்சியாக இருந்து ஆட்சியைப் பிடிக்க உதவிய அதே ரீல்ஸ் கலாச்சாரம், இன்று ஆளுங்கட்சியாகப் பொறுப்பேற்ற பிறகு விஜய் அரசுக்குக் கடுமையான தலைவலியாக உருவெடுத்துள்ளது என்றுதான் கூற வேண்டும். இதற்கு அண்மைய சான்றாக, தவெக அமைச்சர் கீர்த்தனாவின் அரசுப் பள்ளி ஆய்வு வீடியோ சமூக வலைதளங்களில் புயலைக் கிளப்பியுள்ளது. முதல் பெஞ்ச் மாணவியிடம் ஆங்கிலத்தில் பேசச் சொன்னதும், கடைசி பெஞ்ச் மாணவிகளைப் பற்றிக் குறிப்பிட்டதும் அவரின் அதிகாரத் தோரணையை வெளிப்படுத்துவதாகக் கூறி எதிர்க்கட்சித் தலைவர் உதயநிதி ஸ்டாலின் முதல் பாஜக தலைவர் நயினார் நாகேந்திரன் வரை கடுமையான கண்டனங்களை முன்வைத்துள்ளனர். முன்னதாக, இவர் கோட்-சூட் அணிந்து வெளியிட்ட தொழில் முதலீட்டு ரீல்ஸும் பெரும் விவாதப் பொருளானது குறிப்பிடத்தக்கது.
இதேபோன்று, ‘ஒயிட் பவுடர்’ விவகாரம் தவெக அரசுக்குப் பேரிடியாக அமைந்துள்ளது. அமைச்சர் சரத்குமார் ஐபிஎல் போட்டியின் போது போதைப்பொருள் பயன்படுத்தியதாக எழுந்த குற்றச்சாட்டு, முதல்வர் விஜய்க்குப் பெரும் சங்கடத்தை ஏற்படுத்தியது. தனது குழந்தைக்காக மாத்திரையை உடைத்ததாக அவர் விளக்கமளித்த போதிலும், திமுக மாணவர் அணி இதனைப் பெரிய போராட்டமாக மாற்றியது. இதுமட்டுமன்றி, கடற்கரையில் கையில் டின் பீருடன் சரத்குமார் உலா வருவது போன்ற காட்சிகளும் வெளியாகி அதிர்வலைகளை ஏற்படுத்தின. அமைச்சர்கள் ஒருபுறமிருக்க, தவெக-வின் மாவட்ட, ஒன்றிய செயலாளர்களும் அரசு அலுவலகங்கள், மருத்துவமனைகளில் ஆய்வு என்ற பெயரில் அத்துமீறி வீடியோக்களை வெளியிட்டு, அரசுக்குக் கூடுதல் நெருக்கடியைத் தந்து வருகின்றனர். இதன் விளைவாகவே, அமைச்சர்கள், எம்.எல்.ஏ-க்கள் தவிர வேறு யாரும் ஆய்வுகளில் ஈடுபடக் கூடாது என அக்கட்சியின் பொதுச்செயலாளரும் அமைச்சருமான புஸ்ஸி ஆனந்த் கடுமையான அறிவுறுத்தல்களை வழங்க வேண்டியதாயிற்று.
இத்தனை எச்சரிக்கைகளுக்குப் பிறகும், போலியோ சொட்டு மருந்து முகாம்கள், கோயில்கள் மற்றும் ஸ்ரீரங்கம் அரசு மருத்துவமனை வரை தவெக நிர்வாகிகள் ‘ரீல்ஸ்’ மோகத்தால் மருத்துவர்களையும் செவிலியர்களையும் பாதிப்புக்குள்ளாக்கியதும், அதற்கு எதிரான போராட்டங்களும் தவெக-வின் டிஜிட்டல் போக்கின் தீவிரத்தைக் காட்டுகின்றன. தேர்தல் களத்தில் வெற்றியைத் தேடித்தந்த ஒரு வியூகம், ஆட்சி அதிகாரத்திற்கு வந்த பிறகும் அதே வடிவத்தில் தொடர்வது சாதகமான பலனைத் தராது; மாறாக, அது எதிர்மறையான விமர்சனங்களையே குவிக்கும் என அரசியல் பார்வையாளர்கள் எச்சரிக்கின்றனர். எனவே, தமிழக வெற்றிக் கழகம் தனது டிஜிட்டல் அணுகுமுறையைச் சீரமைத்துக் கொண்டு முதிர்ச்சியான நிர்வாகத்தை வெளிப்படுத்தத் தவறினால், அதுவே அக்கட்சியின் மிகப்பெரிய பின்னடைவாக முடியும் என்பதில் ஐயமில்லை.
கோலாப்பூர் – இச்சல்கரஞ்சி-கப்னூர் வழித்தடத்தில் உள்ள கப்னூர் சௌக் பகுதியில் அதிவேகமாக வந்த டாடா பஞ்ச் கார், முன்னால் சென்று…
உணவகத்தின் கலகலப்பான சத்தங்களுக்கு நடுவே, மேஜையின் நடுவில் வைக்கப்பட்டிருந்த ஹாட் பாட் பாத்திரம் மெல்லிய புகையுடன் கொதித்துக் கொண்டிருந்தது. தட்டிலிருந்த…
தலைநகர் டெல்லி மயூர் விஹார் பகுதியில் உள்ள தனியார் பள்ளியில் 3-ஆம் வகுப்பு படித்து வந்த 9 வயது சிறுமி…
கேரளாவில் வெளிநாட்டிலிருந்து சட்டவிரோதமாகக் கடத்தி வரப்பட்ட பல லட்சம் ரூபாய் மதிப்புள்ள தங்கத்தைக் கவர்ந்து செல்ல, பெண் ஒருவர் திரைப்பட…
உத்தரப் பிரதேச மாநிலம் புதௌன் மாவட்டத்தைச் சேர்ந்த கருலியா கிராமத்தைச் சேர்ந்தவர் ஏக்தா. ஏழு மாதக் கர்ப்பிணியாக இருந்த இவருக்குச்…
உத்தரப் பிரதேச மாநிலத்தில் 11-ஆம் வகுப்பு படித்துக் கொண்டிருந்த போதே காதலிப்பதாகக் கூறி, 10 ஆண்டுகள் அத்துமீறலில் ஈடுபட்டு ஏமாற்றிய…