பதற வைக்கும் வீடியோ…. மேடையில் கெட்ட வார்த்தை… நாஞ்சில் சம்பத் மீது பாய்ந்த திமுக தொண்டர்கள்…. முகப்பேரில் பரபரப்பு….!

சென்னை முகப்பேரில் உள்ள பிரபல தனியார் ஊடக அரங்கில் நடைபெற்ற அரசியல் விவாத நிகழ்ச்சியில் கலந்துகொண்ட நாஞ்சில் சம்பத்துக்கும், திமுக தொண்டர்களுக்கும் இடையே கடுமையான மோதல் ஏற்பட்டது. தமிழக வெற்றிக் கழகம் சார்பில் பங்கேற்ற நாஞ்சில் சம்பத், விவாதத்தின் போது திமுகவை மிகக் காட்டமாக விமர்சித்துப் பேசினார். பேச்சு தீவிரமடைந்த கட்டத்தில், அவர் திமுகவினரை நோக்கி மிகவும் மோசமான கெட்ட வார்த்தைகளைப் பயன்படுத்தியதாகக் கூறப்படுகிறது.

நாஞ்சில் சம்பத்தின் இந்த காரசாரமான வார்த்தைப் பிரயோகத்தைக் கேட்டு ஆத்திரமடைந்த அரங்கில் இருந்த திமுக தொண்டர்கள் மற்றும் ஆதரவாளர்கள், அவருக்கு எதிராக உடனடியாகக் கோஷங்களை எழுப்பி கடும் எதிர்ப்பைப் பதிவு செய்தனர். அரசியல் கருத்து வேறுபாடுகள் இருந்தாலும் விவாத மேடையில் இத்தகைய ஆபாசமான மொழியை எப்படிப் பயன்படுத்தலாம் என வினா எழுப்பியவாறு, சிலர் அவரைத் தாக்குவதற்காக மேடையை நோக்கிப் பாய்ந்தனர்.

வாக்குவாதம் முற்றிய நிலையில், அரங்கில் திரண்டிருந்த திமுக ஆதரவாளர் ஒருவர் ஆத்திரத்தில் அங்கிருந்த பிளாஸ்டிக் சேர் ஒன்றை நாஞ்சில் சம்பத்தை நோக்கி வீசியெறிந்தார். அந்த நாற்காலி நேரடியாக நாஞ்சில் சம்பத்தின் முகத்திலும் தலையிலும் பலமாகத் தாக்கியதில் அவர் நிலைதடுமாறி பதறியடித்துப் பின்வாங்கினார். இச்சம்பவத்தால் விவாத அரங்கம் முழுவதுமாகக் கலவரக் களமாக மாறியதுடன் பெரும் பரபரப்பும் நிலவியது.

சூழல் கைமீறிச் சென்றதால், அசம்பாவிதங்களைத் தவிர்க்கும் பொருட்டு விவாத நிகழ்ச்சி பாதியிலேயே உடனடியாக நிறுத்தப்பட்டது. அங்கு பாதுகாப்பிற்கு நின்ற காவல்துறையினர் விரைந்து செயல்பட்டு திமுகவினரைக் கட்டுப்படுத்த முயன்றனர். தொடர்ந்து பதற்றம் நீடித்த நிலையில், விவாதத்தில் பங்கேற்றிருந்த திமுக மாநில நிர்வாகி ராஜீவ் காந்தி தலையிட்டுத் தொண்டர்களைச் சமாதானப்படுத்திய பிறகே சூழல் சற்றே கட்டுக்குள் வந்தது. தற்போது இது தொடர்பான வீடியோ காட்சிகள் சமூக வலைத்தளங்களில் வைரலாகப் பரவி வருகின்றன.