“என்னது என் வீட்ல ஐ.டி ரெய்டு நடக்குதா?…. நான் யாருக்கும் பினாமி இல்ல”…. கொந்தளித்த தவெக நிர்வாகி மீனா ஜெயக்குமார்…. வைரலாகும் பரபரப்பு வீடியோ….!

கோவை ராமநாதபுரத்தைச் சேர்ந்த தமிழக வெற்றிக் கழக நிர்வாகியும், ‘ஆலம் விழுதுகள்’ அறக்கட்டளையின் நிறுவனருமான மீனா ஜெயக்குமார், தனது வீட்டில் வருமான வரித்துறை சோதனை நடைபெறுவதாக சமூக வலைதளங்களில் பரவி வரும் வதந்திகளுக்கு மறுப்பு தெரிவித்துள்ளார். அழகு நிலையம் நடத்தி வருவதுடன், பல்வேறு சமூகப் பணிகளிலும் தன்னை ஈடுபடுத்திக் கொண்டுள்ள இவர், ஆரம்பத்தில் தி.மு.க-வில் முக்கியப் பொறுப்பு வகித்து, பின்னர் த.வெ.க-வில் இணைந்தார். கடந்த 2023-ஆம் ஆண்டிலும் இவரது வீட்டில் ஐ.டி சோதனை நடைபெற்றதாக வதந்திகள் பரவியது குறிப்பிடத்தக்கது.

தற்போது மீண்டும் இவரது வீட்டில் வருமான வரித்துறை சோதனை நடப்பதாக இணையத்தில் தகவல்கள் பரவியதைத் தொடர்ந்து, மீனா ஜெயக்குமார் உடனடியாக ஒரு வீடியோவை வெளியிட்டு அதற்கு முற்றுப்புள்ளி வைத்துள்ளார். அந்த வீடியோவில் மிகுந்த ஆவேசத்துடன் பேசிய அவர், “என்னது எங்க வீட்டில் ரெய்டா..? எங்க வீட்டில் எந்தவிதமான ரெய்டும் நடக்கவில்லை. நான் யாருக்கும் பினாமி இல்லை; பினாமியாக இருப்பதற்கு எங்களுக்கு எந்தத் தேவையும் கிடையாது. நாங்கள் ஒவ்வொருவரும் கடுமையாக உழைத்து, கஷ்டப்பட்டு சம்பாதித்துதான் சொத்து சேர்த்துள்ளோம்” என்று திட்டவட்டமாகத் தெரிவித்துள்ளார்.

சமூக வலைதளங்களில் ஆதாரமற்ற தகவல்களைப் பரப்பி அரசியல் மற்றும் தனிப்பட்ட செல்வாக்கைக் குலைக்கச் செய்யும் முயற்சிகளுக்கு இந்த வீடியோ மூலம் அவர் முற்றுப்புள்ளி வைத்துள்ளார். த.வெ.க நிர்வாகி மீனா ஜெயக்குமார் வெளியிட்டுள்ள இந்த விளக்கம் தற்போது இணையத்தில் பெரும் வைரலாகி வருவதுடன், அரசியல் வட்டாரத்திலும் பொதுமக்களிடையேயும் பெரும் விவாதத்தை ஏற்படுத்தியுள்ளது.