ஆட்சிக்கே ஆபத்தா?…. இரண்டே தொகுதிக்கு 11 அமைச்சர்கள்… பதற்றத்தில் விஜய் அரசு…. உளவுத்துறை கொடுத்த ரகசிய ரிப்போர்ட்….!

தமிழகத்தில் காலியாக உள்ள மதுராந்தகம் மற்றும் தாராபுரம் ஆகிய இரண்டு சட்டமன்றத் தனித்தொகுதிகளுக்கான இடைத்தேர்தல் வரும் அக்டோபர் 6-ஆம் தேதி நடைபெற உள்ளது. பொதுத்தேர்தல் முடிந்து சில மாதங்களிலேயே வந்துள்ள இந்த இடைத்தேர்தல், ஆளுங்கட்சியான தமிழக வெற்றிக் கழகத்திற்கு மிக முக்கியமான முதல் அரசியல் களமாகப் பார்க்கப்படுகிறது. இந்நிலையில், இவ்விரு தொகுதிகளின் தேர்தல் பணிக்காக 11 அமைச்சர்கள் மற்றும் 8 சட்டமன்ற உறுப்பினர்கள் அடங்கிய பிரம்மாண்ட தேர்தல் பணிக்குழுப் பட்டியலைத் தவெக தலைமை அறிவித்துள்ளது. இரண்டே தொகுதிகளுக்கு இவ்வளவு பெரிய படை இறக்கப்பட்டுள்ளதைப் பார்த்து, எதிர்க்கட்சிகளும் அரசியல் அவதானிகளும் “ஆளுங்கட்சிக்கு இது பதற்றமா அல்லது கௌரவப் பிரச்சினையா?” என்ற கேள்விகளை எழுப்பி வருகின்றனர்.

த.வெ.க தலைமை வெளியிட்டுள்ள அதிகாரப்பூர்வ அறிவிப்பின்படி, இரு தொகுதிகளின் ஒட்டுமொத்த தேர்தல் பணிகளையும் மேற்பார்வையிட அமைச்சர்கள் N. ஆனந்த் (புஸ்ஸி ஆனந்த்), K.A. செங்கோட்டையன், CTR நிர்மல் குமார் ஆகிய 3 முக்கிய அமைச்சர்கள் பொது கண்காணிப்பாளர்களாக நியமிக்கப்பட்டுள்ளனர். மதுராந்தகம் (தனி) தொகுதிக்கு முதன்மைப் பொறுப்பாளராக அமைச்சர் ஆதவ் அர்ஜுனாவும், இணைப் பொறுப்பாளர்களாக அமைச்சர்கள் H. ராஜ்குமார், K. தென்னரசு, I. வினோத் ஆகியோரும் நியமிக்கப்பட்டுள்ளனர். மேலும், P. சரவணமூர்த்தி, S. தியாகராஜன், B. விஜயராஜ், காமாட்சி ஆகிய 4 எம்.எல்.ஏ-க்களும், செங்கல்பட்டு தெற்கு மாவட்டச் செயலாளர் M.S. பாலாஜியும் அங்குத் துணைப் பொறுப்பாளர்களாகக் களமிறக்கப்பட்டுள்ளனர்.

அதேபோல், கொங்கு மண்டலத்தைச் சேர்ந்த தாராபுரம் (தனி) தொகுதியின் முதன்மைப் பொறுப்பாளராக அமைச்சர் Dr. K.G. அருண்ராஜ் பொறுப்பேற்றுள்ளார். அவருடன் இணைந்து பணியாற்ற அமைச்சர்கள் M. விஜய் பாலாஜி, T. விஜயலட்சுமி, லோகேஷ் தமிழ்ச்செல்வன் ஆகிய 3 இணைப் பொறுப்பாளர்களும் நியமிக்கப்பட்டுள்ளனர். மேலும், S. பாலமுருகன், V. சத்தியபாமா, K. ராம்குமார், C.S. திலீப், M. சத்யா ஆகிய 5 எம்.எல்.ஏ-க்கள் தாராபுரத்தின் துணைப் பொறுப்பாளர்களாகக் களத்தில் தீவிரப் பணியாற்ற நியமிக்கப்பட்டுள்ளனர்.

ஆட்சிப் பொறுப்பேற்ற பிறகு சந்திக்கும் முதல் தேர்தல் என்பதால், இதில் ஏற்படும் சிறு சறுக்கலும் அரசின் நற்பெயருக்குப் பாதிப்பை ஏற்படுத்தக்கூடும் என்பதால் வெற்றியே இலக்காகத் த.வெ.க செயல்படுகிறது. குறிப்பாகத் தாராபுரம் தொகுதியில் உள்ளூர் அளவில் நிலவும் வாக்குச் சிதறல்கள் மற்றும் பிற்படுத்தப்பட்ட சமூக வாக்குகளின் நிலைப்பாடு குறித்த அச்சத்தைச் சரிசெய்ய மூத்த அமைச்சர்கள் களமிறக்கப்பட்டுள்ளனர். இதனுடன் திமுக, அதிமுக, நாம் தமிழர் மற்றும் இடதுசாரிகள் என ஐந்து முனைப் போட்டி நிலவுவதுடன், இழந்த செல்வாக்கை மீட்க அதிமுகவும், தனது பலத்தைக் காட்ட திமுகவும் தீவிரமாக முயல்வதால் தேர்தல் களம் உச்சக்கட்ட சூட்டை எட்டியுள்ளது.

“இரண்டு தொகுதிகளுக்கு முழு அமைச்சரவையையும் திரட்டுவது த.வெ.க-வின் பலவீனத்தையும், மக்கள் மத்தியில் நிலவும் எதிர்ப்பையும் காட்டுகிறது” என எதிர்க்கட்சிகள் கடுமையாக விமர்சித்து வருகின்றன. ஆனால், “இது பதற்றத்தின் வெளிப்பாடு அல்ல; துல்லியமாகத் திட்டமிடப்பட்ட தேர்தல் வியூகம். மக்களின் குறைகளை நேரடியாகக் கேட்டு நிவர்த்தி செய்வதற்காகவே இந்த அமைப்பியல் கட்டமைப்பு” என்று த.வெ.க தரப்பில் விளக்கம் அளிக்கப்பட்டுள்ளது. வரும் அக்டோபர் 6-ஆம் தேதி நடைபெறும் வாக்குப்பதிவில், இந்த 11 அமைச்சர்களின் தீவிரக் களப்பணி த.வெ.க-வுக்கு வெற்றியைத் தேடித்தருமா என்பதைத் தேர்தல் முடிவுகளே தீர்மானிக்கும்.