சுடாதீங்க.. எங்களை விட்டுடுங்க”… ஹார்முஸ் நீரிணையில் இந்திய மாலுமி எழுப்பிய மரண ஓலம்… ஈரான் ராணுவம் அட்டூழியம்…!

ஹார்முஸ் நீரிணையில் இந்திய எண்ணெய் கப்பல்கள் ஈரானியப் புரட்சிகர காவல் படையினரால் (IRGC) தடுத்து நிறுத்தப்பட்டதும், துப்பாக்கிச் சூடு நடத்தப்பட்டதும் சர்வதேச அளவில் பெரும் பரபரப்பை ஏற்படுத்தியுள்ளது. இந்தியக் கொடியுடன் சென்ற ‘பாக்ய லக்ஷ்மி’ என்ற கப்பல் ஈரானியப் படையினரால் எச்சரிக்கப்பட்டுத் திருப்பி அனுப்பப்பட்ட நிலையில், ‘சன்மார் ஹெரால்டு’ என்ற மற்றொரு கப்பல் மீது துப்பாக்கிச் சூடு நடத்தப்பட்டுள்ளது. “அனுமதி கொடுத்த பின் ஏன் சுடுகிறீர்கள்?” என அந்த கப்பல் மாலுமி எழுப்பிய அபயக்குரல், அப்பகுதியில் நிலவும் தீவிரமான சூழலை வெளிச்சம் போட்டுக் காட்டியுள்ளது.

அதிர்ஷ்டவசமாக, இந்தத் தாக்குதலில் இந்திய மாலுமிகளுக்குக் காயம் ஏதும் ஏற்படவில்லை என்றும், கப்பல்களுக்குப் பெரிய பாதிப்பில்லை என்றும் தகவல்கள் வெளியாகியுள்ளன. இருப்பினும், நீண்டகால நட்பு நாடான ஈரான், இந்தியக் கப்பல்கள் மீது இத்தகைய நடவடிக்கையை எடுத்தது இந்திய வெளியுறவுத் துறையை அதிர்ச்சியடையச் செய்துள்ளது. இது குறித்து தனது கடும் கண்டனத்தைத் தெரிவித்துள்ள இந்திய அரசு, வெளியுறவுச் செயலாளர் விக்ரம் மிஸ்ரி மூலம் ஈரானியத் தூதரை நேரில் அழைத்து இந்தியக் கப்பல்களின் பாதுகாப்பை உறுதி செய்யுமாறு வலியுறுத்தியுள்ளது.

இந்த விவகாரம் விஸ்வரூபம் எடுத்ததை அடுத்து, இந்தியாவில் உள்ள ஈரானியப் பிரதிநிதி டாக்டர் அப்துல் மஜித் ஹக்கீம் இலாஹி விளக்கமளித்துள்ளார். இந்தியாவுடனான உறவு மிகவும் வலிமையானது என்றும், இந்தச் சம்பவம் குறித்து விரிவான விசாரணை நடத்தப்படும் என்றும் அவர் உறுதியளித்துள்ளார். ஒருபுறம் சமாதானப் பேச்சுக்கள் நடந்தாலும், மறுபுறம் ஹார்முஸ் நீரிணை முழுமையாகத் தங்கள் கட்டுப்பாட்டில் இருப்பதாகவும், விதிகளை மீறும் அல்லது எதிரி நாடுகளுக்கு ஆதரவாகச் செயல்படும் கப்பல்கள் மீது கடும் நடவடிக்கை எடுக்கப்படும் என்றும் ஈரானியப் படை எச்சரிக்கை விடுத்துள்ளது.

இந்தியா தனது கச்சா எண்ணெய் தேவையின் பெரும்பகுதியை இந்தப் பாதை வழியாகவே இறக்குமதி செய்கிறது. எனவே, ஹார்முஸ் நீரிணையில் நிலவும் இந்தப் பதற்றம் இந்தியாவின் எரிசக்தி பாதுகாப்பிற்குப் பெரும் சவாலாக மாறியுள்ளது. ஒருபுறம் ஈரானுடன் இருக்கும் வரலாற்று ரீதியான உறவைத் தக்கவைத்துக் கொள்வதும், மறுபுறம் சர்வதேச கடல் வழிப் பாதையில் இந்தியக் கப்பல்களின் பாதுகாப்பை உறுதி செய்வதும் இந்தியாவிற்கு இப்போது ஒரு இக்கட்டான ராஜதந்திர சோதனையாக உருவெடுத்துள்ளது.