“அது AI வீடியோ இல்ல.. நிஜம்!”… இரவோடு இரவாக டிடிவி தினகரன் உடைத்த பர்னிச்சர்… இருந்த ஒரு எம்எல்ஏவும் போச்சு…. ஷாக்கில் அமமுக…!

தமிழக அரசியலில் பெரும் பரபரப்பை ஏற்படுத்தியிருந்த ஆட்சி அமைக்கும் விவகாரத்தில், அம்மா மக்கள் முன்னேற்ற கழகத்தின் ஒரே ஒரு சட்டமன்ற உறுப்பினரான காமராஜ், தமிழக வெற்றிக் கழகத்திற்கு (தவெக) ஆதரவு தெரிவித்திருப்பது அரசியல் வட்டாரத்தில் புயலைக் கிளப்பியுள்ளது. முன்னதாக, காமராஜ் ஆதரவு கடிதம் கொடுத்ததாக வெளியான தகவலைத் தொடர்ந்து, டிடிவி தினகரன் இரவோடு இரவாக ஆளுநரைச் சந்தித்து அது “போலியான கடிதம்” என்றும், விஜய் தரப்பு “குதிரை பேரத்தில்” ஈடுபடுவதாகவும் புகார் அளித்தார். காமராஜை நேரில் அழைத்துச் சென்று ஆளுநர் முன் நிறுத்திய தினகரன், ஆதரவு அளிப்பது போன்ற வீடியோக்கள் அனைத்தும் ஏஐ (AI) தொழில்நுட்பத்தால் உருவாக்கப்பட்டவை எனச் சாடினார்.

தவெக தலைவர் விஜய் ஆட்சி அமைக்க உரிமை கோரி ஆளுநரைச் சந்தித்தபோது, காங்கிரஸ் மற்றும் இடதுசாரி கட்சிகளுடன் அமமுக எம்.எல்.ஏவின் ஆதரவு கடிதத்தையும் சமர்ப்பித்ததாகக் கூறப்பட்டது. இதனை வன்மையாக மறுத்த டிடிவி தினகரன், தனது கட்சிக்குள் குழப்பத்தை ஏற்படுத்த விஜய் முயற்சிப்பதாகக் கூறி, கிண்டி காவல் நிலையத்திலும் புகார் அளித்தார். “எங்கள் எம்.எல்.ஏ என்னுடன்தான் இருக்கிறார், அவர் கையெழுத்திடவே இல்லை” என்று ஆக்ரோஷமாகப் பேட்டியளித்த தினகரனுக்குப் பின்னால் நின்ற காமராஜும் அப்போது ஆமோதிப்பது போலவே காணப்பட்டார்.

இருப்பினும், இன்று சட்டமன்றத்தில் நடந்த நிகழ்வுகள் டிடிவி தினகரனுக்குப் பேரதிர்ச்சியாக அமைந்தன. அவை நடவடிக்கைகளின் போது பேசிய மன்னார்குடி எம்.எல்.ஏ காமராஜ், தான் தவெக ஆட்சிக்கு முழு ஆதரவு அளிப்பதாகத் பகிரங்கமாகத் தெரிவித்தார். இதன் மூலம் கடந்த சில நாட்களாக டிடிவி தினகரன் முன்வைத்த “ஏஐ வீடியோ” மற்றும் “போலி கடிதம்” புகார்கள் அனைத்தும் கேள்விக்குறியாகியுள்ளன. இந்தத் தலைகீழ் மாற்றத்தால் ஆத்திரமடைந்த தினகரன், உடனடியாக காமராஜைக் கட்சியிலிருந்து நீக்கி உத்தரவிட்டுள்ளார்.

இந்தச் சம்பவம் தமிழக அரசியலில் “குதிரை பேரம்” குறித்த விவாதத்தை மீண்டும் முன்னெடுத்துள்ளது. “காமராஜ் கையெழுத்திடவே இல்லை” என்று ஆளுநரிடம் பொய் புகார் அளித்தாரா தினகரன் அல்லது கடைசி நேரத்தில் காமராஜின் மனம் மாறியதா என்ற கேள்விகள் எழுந்துள்ளன. விஜய்யின் அரசியல் நகர்வுகள் ஒருபுறம் வெற்றியைக் கொடுத்தாலும், தினகரனின் கடுமையான விமர்சனங்களும் காமராஜின் இந்தத் திடீர் முடிவும் வரும் நாட்களில் சட்டசபையில் பெரும் சலசலப்பை ஏற்படுத்தும் என எதிர்பார்க்கப்படுகிறது.