ஈரானுக்கு டிரம்ப் கொடுத்த இறுதி எச்சரிக்கை.. “இனி விலையைக் கொடுக்க வேண்டும்” உலகப்போர் பதற்றத்தில் சர்வதேச நாடுகள்..!!

அமெரிக்க அதிபர் டொனால்ட் டிரம்ப், தங்களுக்கு மிகவும் சாதகமாக அமையவிருந்த அமைதி ஒப்பந்தத்தைப் பேசி முடிக்காமல் காலத்தைக் கடத்திவிட்டதாக ஈரான் மீது சமூக ஊடகப் பக்கத்தில் மிகக் கடுமையான எச்சரிக்கையை விடுத்துள்ளார். பேச்சுவார்த்தையைத் தாமதப்படுத்தியதற்காக ஈரான் இனி அதற்கான விலையைக் கொடுக்க வேண்டியிருக்கும் என்று கூறியுள்ள அவர், அந்நாட்டின் ராணுவம் தற்போது படுமோசமான நிலையில் உள்ளதாகக் குறிப்பிட்டுள்ளார். மேலும், ஈரானின் கடற்படை மற்றும் விமானப்படை ஆகியவை முற்றிலும் வீழ்த்தப்பட்டு, தற்போது பெயரளவிற்கே இருப்பதாகக் கூறி டிரம்ப் சாடியுள்ளார்.

ஈரான் தரப்பில் வெறும் பேச்சுக்கள் மட்டுமே உள்ளதே தவிர, செயலில் ஒன்றுமில்லை என்று விமர்சித்துள்ள டிரம்ப், ஃபாக்ஸ் நியூஸ் ஊடகத்திற்கு அளித்த பேட்டியில் ஈரானின் மின் உற்பத்தி நிலையங்கள் மற்றும் பாலங்களை இலக்காகக் கொண்டு புதிய தாக்குதல்களை நடத்த உத்தரவிடும் நிலைக்குத் தான் நெருங்கிவிட்டதாக எச்சரித்துள்ளார். இரு தரப்பிற்கும் இடையே பிராந்தியத்தில் ஏவுகணைத் தாக்குதல்கள் பரிமாறப்பட்டு, போர் நிறுத்தம் மற்றும் அமைதிப் பேச்சுவார்த்தைகள் முடங்கியுள்ள சூழலில், அமெரிக்க அதிபரின் இந்த அதிரடி அறிக்கை சர்வதேச அரசியல் வட்டாரத்தில் பெரும் பதற்றத்தை ஏற்படுத்தியுள்ளது.