“டைம் முடியப்போகுது.. டீலுக்கு வாங்க…” ஈரானை மிரட்டும் ட்ரம்ப்… தெஹ்ரானில் மர்ம வெடிப்புகளால் பரபரப்பு…!!

அமெரிக்கா மற்றும் ஈரான் இடையிலான போர் பதற்றம் புதிய உச்சத்தை எட்டியுள்ள நிலையில், ஈரான் ஒரு முடிவுக்கு வர வேண்டிய நேரம் நெருங்கிவிட்டதாக அதிபர் டொனால்ட் ட்ரம்ப் கடும் எச்சரிக்கை விடுத்துள்ளார். அமைதி உடன்படிக்கைக்கு ஈரானுக்கு மிகக் குறைந்த காலமே அவகாசம் உள்ளதாகக் குறிப்பிட்ட அவர், அணு ஆயுதங்களைப் பயன்படுத்தாமலேயே ஈரானின் ராணுவத்தை நிலைகுலையச் செய்ய முடியும் எனத் தனது ராணுவ பலத்தைப் பறைசாற்றினார். இந்த எச்சரிக்கையைத் தொடர்ந்து, ஈரானின் தலைநகர் தெஹ்ரானில் மர்மமான முறையில் வெடிப்புச் சத்தங்கள் கேட்டது உலக நாடுகளிடையே பெரும் பரபரப்பை ஏற்படுத்தியுள்ளது; இருப்பினும் இதற்கும் தங்களுக்குமே தொடர்பில்லை என இஸ்ரேல் தரப்பு மறுப்பு தெரிவித்துள்ளது.

ஈரான் மீதான அழுத்தத்தை அதிகரிக்கும் நோக்கில், அமெரிக்கா தனது மூன்றாவது பிரம்மாண்ட விமானம் தாங்கிக் கப்பலான ‘யுஎஸ்எஸ் ஜார்ஜ் எச்.டபிள்யூ புஷ்’ (USS George HW Bush) போர் முனைக்கு அனுப்பியுள்ளது. அரபிக்கடல் மற்றும் செங்கடல் பகுதிகளில் முகாமிட்டுள்ள அமெரிக்கப் படைகள், ஹார்முஸ் ஜலசந்தியில் அத்துமீறும் ஈரான் படகுகளைக் கண்டதும் சுட உத்தரவிடப்பட்டுள்ளதால் போர் மேகங்கள் சூழ்ந்துள்ளன. பாகிஸ்தான் முன்னின்று நடத்தும் அமைதிப் பேச்சுவார்த்தைகள் ஒருபுறம் இழுபறியில் இருந்தாலும், ட்ரம்ப்பின் இந்த ராஜதந்திர மிரட்டல் ஈரானை அடிபணிய வைக்குமா அல்லது உலகப் பொருளாதாரத்தைச் சீர்குலைக்குமா என்ற அச்சம் எழுந்துள்ளது.