“ஷாக்… சீனா, ரஷ்யாவுக்கு செக் வைத்த ட்ரம்ப்…! ஈரானுக்கு உதவினால்… எச்சரித்த அமெரிக்கா…!!

மத்திய கிழக்கு பகுதியில் நிலவி வரும் போர் மற்றும் பதற்றங்களுக்கு மத்தியில், அமெரிக்க அதிபர் டொனால்ட் ட்ரம்ப் தனது ட்ரூத் சோஷியல் சமூக வலைதளப் பக்கத்தில் முக்கியப் பதிவு ஒன்றை வெளியிட்டுள்ளார். பெய்ஜிங்கில் நடைபெற்ற சந்திப்பின்போது, எந்த சூழ்நிலையிலும் ஈரானுக்கு ஆயுதங்களை வழங்கவோ அல்லது விற்கவோ மாட்டேன் என சீன அதிபர் ஷி ஜின்பிங் உறுதி அளித்ததாக ட்ரம்ப் தெரிவித்துள்ளார். அதேபோல, ரஷ்ய அதிபர் விளாடிமிர் புதினும் ஈரானுக்கு ஆயுதங்களை விற்க மாட்டேன் எனத் தன்னிடம் கூறியிருப்பதாகக் குறிப்பிட்டுள்ள ட்ரம்ப், இவ்விரு தலைவர்களின் வார்த்தைகளையும் தாம் நம்புவதாகக் கூறியுள்ளார்.

மேலும், உக்ரைனுக்கு அமெரிக்கா நேரடியாக ஆயுதங்களை விற்பனை செய்வதில்லை என்றும், நேட்டோ நாடுகளுக்கே விற்பதாகவும், அதை அவர்கள் எப்படி விநியோகிக்கிறார்கள் என்பது தனக்குத் தெரியாது என்பதையும் ரஷ்யா புரிந்து வைத்துள்ளதாக ட்ரம்ப் விளக்கியுள்ளார். ஈரான் விவகாரத்தில் சீனா மற்றும் ரஷ்யா ஆகிய இரு முக்கிய நாடுகளும் நேரடியாகப் பங்கேற்கவில்லை என்பது தனது கருத்து எனக் கூறியுள்ள அவர், “ஒருவேளை அவர்கள் ஈரானுக்கு உதவ முன்வந்தால், அது அவர்களுக்கு மிகவும் மோசமான விளைவுகளை ஏற்படுத்தும்; நிச்சயம் அது அவர்களின் நலனுக்கு உகந்ததாக இருக்காது” என்று இரு நாடுகளுக்கும் வெளிப்படையான எச்சரிக்கையையும் விடுத்துள்ளார்.

மத்திய கிழக்கில் அமெரிக்க தளங்கள் மீது ஈரான் நடத்திய தாக்குதல்களுக்கு சீனாவும் ரஷ்யாவும் இலக்கு குறித்த உளவுத் தகவல்களையோ அல்லது தொழில்நுட்ப உதவிகளையோ வழங்கியிருக்கலாம் என அமெரிக்கா சந்தேகப்பட்டு வரும் சூழலில் ட்ரம்ப்பின் இந்த எச்சரிக்கை வெளியாகியுள்ளது. தற்போது போரின் அடுத்தகட்ட பதற்றம் அதிகரித்துள்ள நிலையில், சீனா அல்லது ரஷ்யா போன்ற வல்லரசுகள் இதில் நேரடியாகத் தலையிட்டால் இது மிகப்பெரிய உலகளாவிய போராக மாறக்கூடும் என்ற அச்சம் நிலவுகிறது. இருப்பினும், அத்தகைய சூழல் உருவாகக் கூடாது என்பதே சர்வதேச சமூகத்தின் எதிர்பார்ப்பாக உள்ளது.