அமெரிக்காவில் அடுத்த பரபரப்பு.! “அவர் ராஜினாமா செய்தது சரியான முடிவு தான்” டிரம்பின் காட்டமான அறிவிப்பால் அதிரும் வெள்ளை மாளிகை..!!

அமெரிக்காவின் தேசிய பயங்கரவாத எதிர்ப்பு மையத்தின் (NCTC) இயக்குநரான ஜோ கென்ட், ஈரான் உடனான போருக்கு எதிர்ப்பு தெரிவித்து தனது பதவியை ராஜினாமா செய்துள்ளார். தனது ராஜினாமா கடிதத்தில், மனசாட்சிக்கு விரோதமாக இந்த போரை ஆதரிக்க முடியாது என்றும், ஈரானால் அமெரிக்காவிற்கு நேரடி அச்சுறுத்தல் இல்லை என்றும் அவர் குறிப்பிட்டுள்ளார். டொனால்ட் ட்ரம்ப் நிர்வாகத்தில், ஈரான் போருக்கு எதிர்ப்பு தெரிவித்து விலகிய மிக முக்கியமான மற்றும் மூத்த அதிகாரி இவராவார்.

இந்த போர் அமெரிக்காவின் நலனுக்காகத் தொடங்கப்படவில்லை என்றும், இஸ்ரேல் மற்றும் அதன் ஆதரவு குழுக்களின் அழுத்தத்தின் காரணமாகவே அமெரிக்கா இதில் தள்ளப்பட்டுள்ளது என்றும் ஜோ கென்ட் குற்றம் சாட்டியுள்ளார். மேலும், தவறான தகவல்களைக் கொண்டு போர்ச் சூழலுக்குள் அமெரிக்கா திசைதிருப்பப்பட்டதாக அவர் புகார் கூறியுள்ளார். 2003-ம் ஆண்டு நிகழ்ந்த ஈராக் போருடன் தற்போதைய சூழலை ஒப்பிட்டு, இது தேவையற்ற உயிரிழப்புகளையும் நிதி நெருக்கடியையுமே தரும் என்று அவர் எச்சரித்துள்ளார்.

ஜோ கென்ட்டின் இந்த ராஜினாமா குறித்துக் கருத்து தெரிவித்துள்ள டொனால்ட் ட்ரம்ப், அவர் பாதுகாப்பு விஷயத்தில் பலவீனமானவர் என்று விமர்சித்துள்ளார். ஈரானை ஒரு அச்சுறுத்தலாகக் கருதாத ஒருவர் நிர்வாகத்தில் இல்லாதது நல்லது என்றும், அவர் வெளியேறியது சரியான முடிவு என்றும் ட்ரம்ப் கூறியுள்ளார். அதே நேரத்தில், இஸ்ரேலிய பிரதமர் பெஞ்சமின் நெதன்யாகு, தங்களது கூட்டணி வலுவாக இருப்பதாகவும், ஈரானுக்கு எதிராக மேலும் நடவடிக்கைகள் இருக்கும் எனவும் தெரிவித்துள்ளார்.