நெற்றியில் திருநீரு… கையில் ருத்ராட்சம்… திருவள்ளுவருக்கு மீண்டும் காவி உடை.. ஆளுநரின் செயலுக்கு எதிராகத் திரண்ட திராவிடக் கட்சிகள்..!

தமிழக ஆளுநர் மாளிகையில் திருவள்ளுவர் தினக் கொண்டாட்டங்களின் போது, திருவள்ளுவரின் படம் காவி உடையில் சித்தரிக்கப்பட்டது பெரும் அரசியல் விவாதத்தையும் சர்ச்சையையும் ஏற்படுத்தியுள்ளது. வழக்கமாகத் தமிழ்நாடு அரசால் அதிகாரப்பூர்வமாகப் பயன்படுத்தப்படும் வெள்ளை உடைக்கு மாறாக, காவி நிற உடை, நெற்றியில் திருநீறு மற்றும் உருத்திராட்ச மாலையுடன் கூடிய திருவள்ளுவரின் படத்திற்கு ஆளுநர் மலர் தூவி மரியாதை செலுத்தினார். மேலும் திருவள்ளுவரைப் பாரதிய சனாதன மரபின் மிகச் சிறந்த துறவி என்றும் அவர் வர்ணித்துள்ளார்.

ஆளுநரின் இந்த நடவடிக்கைக்குத் தமிழகத்தின் திராவிட மற்றும் எதிர்க்கட்சிகள் கடும் கண்டனம் தெரிவித்துள்ளன. திருவள்ளுவருக்குக் காவி உடை அணிவிப்பது உலகப் பொதுமறையான திருக்குறளைத் தந்த வள்ளுவரை ஒரு குறிப்பிட்ட மதத்திற்குள் சுருக்கும் ‘காவிமயமாக்கல்’ முயற்சி என்றும், இது தமிழர்களின் கலாச்சார உணர்வுகளைப் புண்படுத்தும் செயல் என்றும் அவர்கள் விமர்சித்துள்ளனர். திருக்குறள் எந்தவொரு மதக் கோட்பாடுகளுக்கும் அப்பாற்பட்டு மனிதநேயத்தை மட்டுமே போதிப்பதாக அவர்கள் சுட்டிக்காட்டியுள்ளனர்.

இதற்குப் பதிலடி கொடுக்கும் விதமாக, தமிழக முதல்வர் மற்றும் அரசியல் தலைவர்கள் தங்களின் சமூக ஊடகப் பக்கங்களில் தமிழ்நாடு அரசால் அங்கீகரிக்கப்பட்ட பாரம்பரிய வெள்ளை உடை அணிந்த திருவள்ளுவரின் படத்தை பகிர்ந்துள்ளனர். பிறப்பொக்கும் எல்லா உயிர்க்கும் என்ற வள்ளுவரின் வரிகளைக் குறிப்பிட்டு, “தமிழ்நாட்டில் எவராலும் வள்ளுவருக்குக் காவிச் சாயம் பூச முடியாது” என்று தங்களின் வலுவான எதிர்ப்பைப் பதிவு செய்துள்ளனர். அதே நேரத்தில், ஆன்மீகவாதியான திருவள்ளுவரின் உண்மையான வடிவம் இதுதான் என்று கூறி ஆளுநரின் செயலுக்கு ஆதரவாக மற்றொரு தரப்பினர் வாதாடி வருகின்றனர்.