பரபரப்பு வீடியோ: மேடையிலேயே தொண்டரின் கன்னத்தில் அறைந்த திருமாவளவன்…. திகைத்துப் போன ஓபிஎஸ்….!

தேனி மாவட்டம் பெரியகுளத்தில் தேர்தல் பரப்புரையின் போது, தொண்டர் ஒருவரை விடுதலை சிறுத்தைகள் கட்சித் தலைவர் திருமாவளவன் அறைந்த சம்பவம் தமிழக அரசியல் களத்தில் பெரும் பரபரப்பை ஏற்படுத்தியுள்ளது. 2026 தமிழக சட்டமன்றத் தேர்தல் நெருங்கி வரும் சூழலில், திமுக தலைமையிலான மதச்சார்பற்ற முற்போக்குக் கூட்டணியில் இடம்பெற்றுள்ள விசிக வேட்பாளர் சக்திவேலை ஆதரித்து திருமாவளவன் நேற்று வாக்கு சேகரிப்பில் ஈடுபட்டார். இந்த பரப்புரையில் திமுகவின் தங்க தமிழ்ச்செல்வன் மற்றும் ஓ.பன்னீர்செல்வம் ஆகியோர் உடன் இருந்த நிலையில், தலைவர்களைக் காணத் திரண்ட தொண்டர்களின் உற்சாகம் எதிர்பாராத மோதலில் முடிந்தது.

பரப்புரை வாகனத்தில் திருமாவளவன் பேசிக் கொண்டிருந்தபோது, அவரைக் காண வந்த தொண்டர்கள் மிகுந்த ஆர்வத்துடன் முண்டியடித்தனர். அப்போது சில தொண்டர்கள் பாதுகாப்பு வளையத்தை மீறி, திருமாவளவன் நின்றிருந்த திறந்தவெளி வாகனத்தின் மீது ஏறி அவருடன் செல்ஃபி எடுக்க முயன்றனர். கூட்ட நெரிசலைத் தவிர்க்கவும், பரப்புரைக்கு இடையூறு ஏற்படாமல் இருக்கவும் திருமாவளவன் ஆரம்பத்தில் தொண்டர்களை அன்பாகக் கீழே இறங்குமாறு அறிவுறுத்தினார். இருப்பினும், ஒரு தொண்டர் விடாப்பிடியாக வாகனத்தில் ஏறியதால் ஆத்திரமடைந்த திருமாவளவன், அந்தத் தொண்டரின் கன்னத்தில் அறைந்தார்.

இந்தத் திடுக்கிடும் சம்பவத்தைக் கண்டு மேடையில் இருந்த ஓ.பன்னீர்செல்வம் உள்ளிட்ட முக்கிய தலைவர்கள் மற்றும் அங்கிருந்த பொதுமக்கள் அதிர்ச்சியில் உறைந்தனர். அடி வாங்கிய தொண்டரை அங்கிருந்த மற்ற நிர்வாகிகள் சமாதானப்படுத்தி கீழே அழைத்துச் சென்றனர். இந்தச் சம்பவம் தொடர்பான வீடியோ சமூக வலைதளங்களில் மிகவேகமாகப் பரவி வரும் நிலையில், அரசியல் விமர்சகர்கள் மற்றும் பொதுமக்கள் மத்தியில் இது விவாதப் பொருளாக மாறியுள்ளது. தொண்டர்களின் அத்துமீறல் தவறாக இருந்தாலும், ஒரு பொறுப்பான தலைவர் நிதானத்தை இழந்திருக்கக் கூடாது என்ற கருத்துக்கள் முன்வைக்கப்படுகின்றன.

ஐந்து முனைப் போட்டி நிலவும் இந்தத் தேர்தல் களத்தில், வாக்குப்பதிவிற்கு இன்னும் இரண்டு வாரங்களே உள்ள நிலையில் இத்தகைய சர்ச்சைகள் வேட்பாளர்களின் வெற்றி வாய்ப்பைப் பாதிக்குமோ என்ற அச்சம் கூட்டணி கட்சியினரிடையே எழுந்துள்ளது. “தொண்டர்களைக் கையாள்வதில் திருமாவளவன் எப்போதும் மென்மையானவர், ஆனால் கூட்ட நெரிசலில் ஏற்பட்ட பதற்றத்தால் இது நடந்திருக்கலாம்” என ஒரு தரப்பினர் ஆதரவு தெரிவித்தாலும், “அன்பாகச் சொல்லியிருக்கலாம் அல்லது பாதுகாவலர்கள் மூலம் கையாண்டிருக்கலாம்” என்பதே பலரின் கருத்தாக உள்ளது. இந்த விவகாரம் தற்போதைய தேர்தல் வெப்பத்தை மேலும் அதிகரித்துள்ளது.