பாமகவுக்கு அடுத்த பேரதிர்ச்சி: “கோடிகளை கொட்டியும் புறக்கணிப்பா?”…. “அன்புமணிக்காக பிரச்சார காரே வாங்கி கொடுத்தேன்”…. தூக்கியெறிய முடிவெடுத்த திலகபாமா….!

பாமகவின் மாநிலப் பொருளாளரும், சிவகாசியைச் சேர்ந்த தொழில் அதிபருமான திலகபாமா, கட்சிப் பணிகளுக்காகத் தனது சொந்தப் பணத்தைக் கோடிக்கணக்கில் செலவிட்டு ஓடாய் உழைத்தும் தொடர்ந்து புறக்கணிக்கப்பட்டு வருவதால், பாமகவில் இருந்து விலக முடிவெடுத்துள்ளதாகத் தகவல்கள் வெளியாகியுள்ளன. மருத்துவர்களைக் கொண்ட மிகப்பெரிய குடும்பப் பின்னணியைக் கொண்டிருந்தபோதிலும், பாமக மீதான ஈடுபாட்டால் அக்கட்சியில் இணைந்து தீவிரமாகப் பணியாற்றினார். அன்புமணி ராமதாஸின் பிரச்சாரத்திற்காகச் சொந்தச் செலவில் அதிநவீன வாகனத்தை வாங்கிக் கொடுத்தது முதல் கட்சி மாநாடுகள் மற்றும் கூட்டங்களுக்குப் பொருளாதார ரீதியாகப் பெரிதும் தோள்கொடுத்தவர் திலகபாமா.

எனினும், இத்தனை தியாகங்களுக்கும் உழைப்பிற்கும் பாமக தலைமையிடமிருந்து அவருக்குக் கிடைத்தது ஏமாற்றமும் புறக்கணிப்பும் மட்டுமே. கடந்த 2021 சட்டமன்றத் தேர்தலில், மாநிலத்தின் செல்வாக்கு மிக்க மூத்த தலைவரான ஐ. பெரியசாமியை எதிர்த்து ஆத்தூர் தொகுதியில் போட்டியிடக் கட்சித் தலைமை இவரைப் பணித்தது. வெற்றி வாய்ப்பு மிகக் குறைவாக இருக்கும் எனத் தெரிந்தும், கட்சியின் கட்டளைக்குக் கட்டுப்பட்டு அத்தொகுதியில் போட்டியிட்டுத் தோல்வியைத் தழுவினார். அதைத் தொடர்ந்து நடந்த தேர்தலிலும், நடிகர் விஜய் போட்டியிட்ட பெரம்பூர் போன்ற கடினமான தொகுதியையே அவருக்கு ஒதுக்கீடு செய்து மீண்டும் சோதித்தது பாமக தலைமை.

வெற்றி வாய்ப்பற்ற தொகுதிகளைத் தொடர்ந்து திலகபாமாவுக்கு ஒதுக்கியதும், 10 ஆயிரத்திற்கும் குறைவான வாக்குகளையே பெற்று அவர் தோல்வியடைந்ததுமான சம்பவங்கள், அவரது குடும்பத்தினரிடையே கடும் அதிருப்தியை ஏற்படுத்தியது. பாமகவிற்காகப் பொருளாதார ரீதியாகவும் அரசியல் ரீதியாகவும் அவர் சந்தித்த பின்னடைவுகள், அவரது குடும்ப உறவுகளிலும் கசப்பை உருவாக்கின. இருந்தபோதிலும், ராமதாஸ் – அன்புமணி இடையிலான உட்கட்சிப் பூசல்களின் போது அன்புமணி பக்கம் உறுதியாக நின்று கட்சி பலம்பெறத் தொடர்ந்து உழைத்து வந்தார்.

தற்போது சௌமியா அன்புமணி போன்றோருக்கு மட்டும் முக்கியத்துவம் அளிக்கப்பட்டு, கட்சியின் மூத்த பொறுப்பிலிருக்கும் திலகபாமா தொடர்ந்து புறக்கணிக்கப்பட்டு வருவது அவருடைய ஆதரவாளர்களிடையேயும் பெரும் கொந்தளிப்பை ஏற்படுத்தியுள்ளது. இத்தனை காலம் உண்மையாகவும் தீவிரமாகவும் உழைத்தும் தகுந்த அங்கீகாரம் கிடைக்காததால், அவரது குடும்பத்தினரின் அழுத்தமும் சேர்ந்துள்ள நிலையில், பாமகவின் ஆரம்பக்கால முதன்மைப் பெண் முகங்களில் ஒருவரான திலகபாமா விரைவில் பாமகவிலிருந்து விலக முடிவெடுத்துள்ளதாகக் கூறப்படுகிறது.