“கண்ணை மூடி 51 முறை மந்திரம் சொல்லுங்க…” முதியவரை ஏமாற்றி கண்ணிமைக்கும் நேரத்தில் நகைகளைப் பறித்த விசித்திரக் கொள்ளையர்கள்…!

மத்தியப் பிரதேச மாநிலம் உஜ்ஜைனியில் உள்ள பிரியதர்ஷினி சௌராஹா பகுதியில், 71 வயதான மனோரமா ஜெயின் என்ற முதியவர் ஆன்மீக சொற்பொழிவைக் கேட்டுவிட்டு நடந்து வீட்டிற்குத் திரும்பிக் கொண்டிருந்தார். அப்போது ஜீன்ஸ் மற்றும் சட்டை அணிந்த இரு இளைஞர்கள் அவரை வழியில் மறித்து, ஒரு மருத்துவர் இருக்கும் முகவரி குறித்து விசாரிப்பது போலப் பேசத் தொடங்கியுள்ளனர். பின்னர் மெதுவாக பேச்சுக் கொடுத்து, முதியவரின் குடும்பத்தின் மீதும், அவரது மகன்கள் மீதும் ‘மரண நிழல்’ சூழ்ந்திருப்பதாகக் கூறி பயமுறுத்தியுள்ளனர்.

அவர்கள் காட்டிய பயத்தால் அச்சமடைந்த அந்த முதியவரிடம், இந்த ஆபத்திலிருந்து மகன்களைக் காப்பாற்ற ஒரு உபாயம் இருப்பதாக அந்த மோசடி நபர்கள் கூறியுள்ளனர். அவர் கழுத்தில் அணிந்திருந்த தங்கச் சங்கிலி மற்றும் விரலில் இருந்த தங்க மோதிரம் ஆகியவைதான் மகன்களுக்குப் பெரிய நஷ்டத்தையும் ஆபத்தையும் ஏற்படுத்துகின்றன என்று கூறி, அவற்றை கழற்றித் தருமாறும், கண்களை மூடிக்கொண்டு 51 முறை மந்திரம் ஜெபிக்குமாறும் கூறியுள்ளனர். மகன்களின் பாதுகாப்பை நினைத்து பயந்த முதியவரும் நகைகளைக் கழற்றி அவர்களிடம் கொடுத்துவிட்டு, கண்களை மூடி சாலையில் நடந்தபடி மந்திரம் ஓதத் தொடங்கியுள்ளார்.

சிறிது நேரம் கழித்து முதியவர் கண்களைத் திறந்து பார்த்தபோது, நகைகளை வாங்கிக்கொண்ட அந்த இரண்டு இளைஞர்களும் அங்கிருந்து மாயமாகி இருந்தனர். தாங்கள் ஏமாற்றப்பட்டதை உணர்ந்த முதியவர், உடனே வீட்டிற்குச் சென்று தனது மகனிடம் நடந்ததைக் கூறியுள்ளார். இதுகுறித்து மாதவ் நகர் காவல் நிலையத்தில் புகார் அளிக்கப்பட்டதை அடுத்து, காவல்துறையினர் வழக்குப் பதிவு செய்து, அப்பகுதியில் உள்ள சிசிடிவி காட்சிகளை ஆய்வு செய்து குற்றவாளிகளைத் தீவிரமாகத் தேடி வருகின்றனர்.