“கூரையை பிச்சிட்டு கொடுத்த தெய்வம்…” ரூ.35-க்கு வாங்கிய லாட்டரி சீட்டு…! ஒரே நாளில் கோடீஸ்வரரான தொழிலாளியின் மனைவி….!!

மேற்கு வங்கத்தைச் சேர்ந்த டோலி பேகம் என்ற சாதாரணத் தொழிலாளியின் மனைவி, வெறும் 35 ரூபாய்க்கு வாங்கிய லாட்டரி சீட்டின் மூலம் ஒரே நாளில் 1 கோடி ரூபாய் வென்று கோடீஸ்வரராகியுள்ளார்.

இவரது கணவர் ஒரு மேஸ்திரியாகக் குறைந்த வருமானத்தில் குடும்பத்தை நடத்தி வந்த நிலையில், குடும்ப வறுமையைப் போக்க டோலி பேகமும் தையல் வேலை செய்து வந்துள்ளார். உடல்நலக் குறைவு காரணமாக மருத்துவமனைக்குச் சென்ற அவர், தற்செயலாக வாங்கிய அந்த ஒரு லாட்டரி சீட்டு அவரது தலையெழுத்தையே மாற்றியுள்ளது.

பரிசு விழுந்த செய்தியை அறிந்த டோலி பேகம், மிகுந்த மகிழ்ச்சியில் தனது குடும்பத்தின் நீண்ட காலக் கனவான சொந்த வீட்டை முதலில் கட்டப்போவதாகவும், தனது பிள்ளைகளை உயர்தரக் கல்வியில் படிக்க வைக்கப் போவதாகவும் தெரிவித்துள்ளார். தமிழகத்தில் லாட்டரிக்குத் தடை விதிக்கப்பட்டிருந்தாலும், கேரளா மற்றும் மேற்கு வங்கம் போன்ற மாநிலங்களில் இது அனுமதிக்கப்பட்டுள்ளது குறிப்பிடத்தக்கது.

அன்றாடச் செலவுக்கே திண்டாடி வந்த ஒரு எளிய குடும்பத்திற்குத் தேடி வந்த இந்த அதிர்ஷ்டம், அந்தப் பகுதி மக்களிடையே பெரும் வியப்பை ஏற்படுத்தியுள்ளது. இத்தனை பெரிய தொகை தங்களுக்குக் கிடைத்திருப்பதை இன்னும் தங்களால் நம்ப முடியவில்லை என அந்தத் தம்பதியினர் நெகிழ்ச்சியுடன் கூறியுள்ளனர்.