“நாங்க தீய சக்திங்கிறதால கூப்பிடலையா?…” விஜய் வாய் திறக்காதது ஏன்?…” பேச்சுவார்த்தை நடத்தினீங்க என்ன ஆச்சு… மேகதாது விவகாரத்தில் பொங்கியெழுந்த முன்னாள் அமைச்சர்…!

மேகதாது அணை விவகாரத்தில் மத்திய நீர்வளத்துறை இணை அமைச்சரின் பதிலும், தமிழக அரசின் மெத்தனப்போக்கும் பெரும் அதிர்ச்சியை ஏற்படுத்தியுள்ளதாக திமுக பொதுச்செயலாளரும் முன்னாள் நீர்வளத்துறை அமைச்சருமான துரைமுருகன் காட்பாடியில் உள்ள தனது இல்லத்தில் செய்தியாளர்களைச் சந்தித்து கடுமையாகச் சாடியுள்ளார். உச்சநீதிமன்ற தீர்ப்பின்படி காவிரி கடைமடை மாநிலங்களான தமிழ்நாடு மற்றும் புதுச்சேரியின் ஒப்புதல் இல்லாமல் கர்நாடகா எந்த புதிய நீர்தேக்கத்தையும் கட்ட முடியாது என்பது தெளிவாகத் தெரிந்தும், மத்திய அமைச்சர் அதற்கு மாறாகப் பேசியுள்ளது அபத்தமானது என்று சுட்டிக்காட்டினார். மேலும், இந்த விவகாரத்தில் தமிழக முதல்வர் நேரடியாகக் கர்நாடகா சென்று பேச்சுவார்த்தை நடத்துவது மிகவும் ஆபத்தானது என்றும், சட்டப்பூர்வமாக நமக்குக் கிடைத்துள்ள உரிமையை விட்டுக்கொடுத்துவிடக் கூடாது என்றும் எச்சரித்தார்.

டெல்டா மாவட்டங்களின் விவசாய நிலங்கள் காய்ந்து பயிர்கள் கருகி வரும் சூழலில், மத்திய அரசின் இத்தகைய நகர்வுகளைக் கர்நாடகா தங்களுக்குச் சாதகமாகப் பயன்படுத்திக் கொள்ளும் என துரைமுருகன் கவலை தெரிவித்தார். இது ஏதோ ஒரு குறிப்பிட்ட கட்சியின் பிரச்சனை அல்ல, ஒட்டுமொத்த தமிழகத்தின் வாழ்வாதாரப் பிரச்சனை என்பதால், தமிழக அரசு உடனடியாக அனைத்துக் கட்சி கூட்டத்தைக் கூட்ட வேண்டும் என்று வலியுறுத்தினார். அனுபவம் வாய்ந்த தலைவர்களுடனும், சட்ட வல்லுநர்களுடனும் கலந்தாலோசித்து, அனைத்துக் கட்சியினரையும் டெல்லிக்கு அழைத்துச் சென்று பிரதமரையும் மத்திய நீர்வளத்துறை அமைச்சரையும் நேரடியாகச் சந்தித்து அழுத்தம் கொடுக்க வேண்டும் என கேட்டுக்கொண்டார்.

தொடர்ந்து தமக்கே உரிய நகைச்சுவை பாணியில் தமிழக அரசைக் கலாய்த்த துரைமுருகன், “தமிழக முதல்வர் அனுபவம் வாய்ந்தவர்களுடன் கலந்தாலோசிப்பதாகக் கூறுகிறார், ஆனால் எங்களிடம் கேட்கவில்லை; நாங்கள்தான் ‘தீய சக்தி’ ஆயிற்றே, அதனால் எங்களை அழைத்து ஆலோசனை கேட்கமாட்டார்கள் போலிருக்கிறது!” என்று கிண்டலாகக் குறிப்பிட்டார். அதேபோல், இவ்வளவு பெரிய விவகாரம் நடந்தும் தவெக தலைவர் விஜய் உள்ளிட்டோர் அமைதி காப்பதையும் சுட்டிக்காட்டித் தன் பாணியில் விமர்சித்தார். தமிழக அரசு இனியும் காலதாமதம் செய்தால் டெல்டா மாவட்டங்கள் முற்றிலும் பாலைவனமாகிவிடும் என்பதால் உடனடியாக உரிய சட்ட நடவடிக்கைகளை எடுக்க வேண்டும் என்றும் அவர் வலியுறுத்தினார்.