டிஜிட்டல் இந்தியா டூ பாத்திரக் கடை..! “உங்க போன், முடியை கொடுங்க பாத்திரம் எடுங்க” இணையத்தை அதிர வைக்கும் பாத்திர வியாபாரி…!!

பண்டமாற்று முறை என்பது இந்தியப் பாரம்பரியத்தில் நீண்டகாலமாகப் புழக்கத்தில் உள்ள ஒன்று. கிராமப்புறங்களிலும் சிறு நகரங்களிலும் பழைய துணிகள் அல்லது இரும்புப் பொருட்களுக்கு ஈடாகப் புதிய எஃகு பாத்திரங்களை வழங்கும் வியாபாரிகளை நாம் இன்றும் காணலாம். ஆனால், அண்மையில் சமூக ஊடகங்களில் வைரலாகி வரும் ஒரு காணொளி, இந்த வழக்கத்தை அடுத்த கட்டத்திற்கு எடுத்துச் சென்றுள்ளது. அந்த வீடியோவில், ஒருவர் தனது மிதிவண்டியில் ஏராளமான பாத்திரங்களைச் சுமந்து கொண்டு, ஒலிபெருக்கி மூலம் விசித்திரமான அறிவிப்பு ஒன்றை வெளியிட்டபடி செல்கிறார்.

அந்த அறிவிப்பில், “சிறிய மொபைல் போன்களுக்குச் சிறிய பாத்திரங்கள், பெரிய போன்களுக்குப் பெரிய பாத்திரங்கள்; உடைந்த மொபைல் போன்களுக்கு ஈடாக எஃகு பாத்திரங்களைப் பெற்றுக் கொள்ளுங்கள்” என்று கூறப்படுகிறது. அதோடு நின்றுவிடாமல், “தாய்மார்கள் மற்றும் சகோதரிகளின் தலைமுடிக்கு ஈடாக உயர்தர எஃகு பாத்திரங்கள் வழங்கப்படும்” என்றும் அந்த நபர் கூறுகிறார். மொபைல் போன்கள் மட்டுமின்றி, மனித முடிக்கு ஈடாகப் பாத்திரங்கள் தருவதாக அவர் கூறுவது காண்போரை ஆச்சரியத்திலும் சிரிப்பிலும் ஆழ்த்தியுள்ளது.

இந்தக் காணொளி இணையத்தில் விவாதப் பொருளாக மாறிய நிலையில், இது உண்மையா அல்லது நகைச்சுவைக்காக உருவாக்கப்பட்டதா என்ற கேள்வி எழுந்தது. இந்தியாவின் சில பகுதிகளில் பழைய தலைமுடிக்கு ஈடாகப் பொருட்கள் வழங்கும் முறை ஏற்கனவே நடைமுறையில் இருந்தாலும், மொபைல் போன்களுக்குப் பாத்திரங்கள் என்பது நம்ப முடியாத ஒன்றாகவே பார்க்கப்படுகிறது. இது குறித்து சமூக ஊடகப் பயனர்கள் சிலர் ஆராய்ந்தபோது, மொபைல் போன்களைப் பாத்திரங்களுக்கு மாற்றுவது என்ற தகவல் நம்பகத்தன்மையற்றது என்றும், இது ஒரு விளம்பர யுக்தியாகவோ அல்லது வேடிக்கைக்காகவோ செய்யப்பட்டிருக்கலாம் என்றும் கருத்துகள் பகிரப்பட்டு வருகின்றன.