“அவங்க மேல ஆக்ஷன் கிடையாது”… எடப்பாடி போட்ட ஒற்றைக் கடிதம்… தப்பிய 21 எம்.எல்.ஏக்கள்…. ஆனால் அந்த 4 பேருக்கு மட்டும் ஏன் இந்த நிலைமை…?

தமிழக அரசியலில் கடந்த சில வாரங்களாக பெரும் பரபரப்பை ஏற்படுத்தியிருந்த அதிமுக எம்.எல்.ஏ.க்களின் கட்சித் தாவல் விவகாரத்தில் தற்போது ஒரு முக்கிய திருப்பம் ஏற்பட்டுள்ளது. சட்டப்பேரவையில் நடைபெற்ற நம்பிக்கை வாக்கெடுப்பில், தமிழக வெற்றிக் கழகம் தலைமையிலான அரசுக்கு எதிராக அதிமுக கொறடா உத்தரவு பிறப்பித்திருந்தது. ஆனால், அதனை மீறி அரசுக்கு ஆதரவாக வாக்களித்த அதிமுக. எம்.எல்.ஏ.க்கள் 21 பேருக்கு எதிராக தகுதி நீக்க நடவடிக்கை எடுக்கப்படாது என்று சபாநாயகர் ஜேசிடி பிரபாகர் அதிரடியாக அறிவித்துள்ளார். இந்த அறிவிப்பு தகுதி நீக்க அச்சத்தில் இருந்த அ.தி.மு.க.வின் முக்கிய தலைவர்களுக்கு பெரும் நிம்மதியை அளித்துள்ளது.

சபாநாயகரின் இந்த முடிவுக்குப் பின்னால் சில முக்கிய அரசியல் நகர்வுகள் இருப்பதாகக் கூறப்படுகிறது. அரசுக்கு ஆதரவாக வாக்களித்த 21 எம்.எல்.ஏ.க்களும் தங்களது செயலுக்காக வருத்தம் தெரிவித்து சபாநாயகர் அலுவலகத்தில் விளக்கக் கடிதம் அளித்திருந்தனர். மேலும், அவர்கள் மீது கடுமையான நடவடிக்கை எடுக்க வேண்டாம் என்று அ.தி.மு.க. பொதுச்செயலாளர் எடப்பாடி பழனிசாமியும் கடிதம் மூலம் கோரிக்கை வைத்திருந்ததாக தகவல்கள் வெளியாகின. எம்.எல்.ஏ.க்கள் தெரிவித்த வருத்தத்தையும், கட்சித் தலைமையின் கருத்தையும் பரிசீலித்தே இந்த முடிவு எடுக்கப்பட்டுள்ளதாக சபாநாயகர் செய்தியாளர்களிடம் விளக்கியுள்ளார். இதன் மூலம் எஸ்.பி. வேலுமணி, சி.வி. சண்முகம், சி. விஜயபாஸ்கர் உள்ளிட்ட முக்கிய தலைவர்கள் தகுதி நீக்க நடவடிக்கையிலிருந்து தப்பியுள்ளனர்.

அதே நேரத்தில், பதவியை ராஜினாமா செய்துவிட்டு அதிகாரப்பூர்வமாக தமிழக வெற்றிக் கழகத்தில் இணைந்த மற்ற 4 எம்.எல்.ஏ.க்கள் மீதான தகுதி நீக்க நடைமுறைகள் தொடங்கப்பட்டுள்ளதாக சபாநாயகர் தெரிவித்துள்ளார். அதன்படி, அ.தி.மு.க.வைச் சேர்ந்த முன்னாள் எம்.எல்.ஏ.க்களான சத்ய பாமா, மரகதம் குமரவேல், ஜெயக்குமார் மற்றும் இசக்கி சுப்பையா ஆகிய 4 பேர் மீது இந்த சட்ட நடவடிக்கை பாய்ந்துள்ளது. கட்சியின் கொறடா உத்தரவை மீறியதோடு மட்டுமல்லாமல், பதவியைத் துறந்துவிட்டு மாற்று முகாமிற்குச் சென்றதால் இவர்கள் மீதான நடவடிக்கை தவிர்க்க முடியாததாக மாறியுள்ளது. இந்த விவகாரத்தில் விசாரணை நிறைவடைந்ததும் இறுதி முடிவு அறிவிக்கப்படும் என்றும் சபாநாயகர் கூறியுள்ளார்.

இந்த சபாநாயகரின் அறிவிப்பு தமிழக அரசியல் களத்தில் மிக முக்கியத்துவம் வாய்ந்ததாகப் பார்க்கப்படுகிறது. ஒருவேளை 21 எம்.எல்.ஏ.க்களும் தகுதி நீக்கம் செய்யப்பட்டிருந்தால், அது அ.தி.மு.க.வின் சட்டப்பேரவை பலத்தை வெகுவாகக் குறைத்திருக்கும். இதனால், அந்த எம்.எல்.ஏ.க்களை மீண்டும் கட்சிக்குள் வைத்துக்கொண்டு எதிர்கால அரசியல் வியூகங்களை வகுக்க எடப்பாடி பழனிசாமி திட்டமிட்டுள்ளார். மறுபுறம், தவெக-வில் இணைந்த 4 பேரின் ராஜினாமா செல்லுபடியாகுமா மற்றும் கட்சித் தாவல் தடைச் சட்டத்தின் கீழ் அவர்களுக்கு என்ன தண்டனை கிடைக்கும் என்பதை அரசியல் கட்சிகள் தற்போது உன்னிப்பாகக் கவனித்து வருகின்றன.