உதவ மறுத்த ஊர் மக்கள்.. குளியலறையிலேயே தங்கையை எரிக்க முயன்ற அண்ணன்… விஞ்ஞானியின் மகளுக்கு நேர்ந்த கொடூர முடிவு… போலீஸாரையே அதிர வைத்த சம்பவம்..!!!

ஜார்க்கண்ட் மாநிலம் தன்பாத்தின் கோவிந்த்பூர் பகுதியில் நிகழ்ந்துள்ள ஒரு அதிர்ச்சிகரமான சம்பவம் நாடு முழுவதும் பெரும் பரபரப்பை ஏற்படுத்தியுள்ளது. மறைந்த ஒரு விஞ்ஞானியின் மகளான லிபிகா குமாரி என்பவர் கடந்த ஏப்ரல் 8-ம் தேதி தனது வீட்டில் மர்மமான முறையில் உயிரிழந்தார். அவரது உயிரிழப்பு குறித்து அண்டை வீட்டாருக்கு லிபிகாவின் சகோதரர் பிரணவ் தகவல் அளித்தும், யாரும் அவருக்கு உதவ முன்வரவில்லை என்று கூறப்படுகிறது.

இதனால், கடந்த ஐந்து நாட்களாக லிபிகாவின் உடல் வீட்டிலேயே கிடந்துள்ளது. இறுதியில் உதவி கிடைக்காத விரக்தியில், பிரணவ் தனது வீட்டின் குளியலறையிலேயே துணிகள் மற்றும் தலையணைகளை அடுக்கி தனது சகோதரியின் உடலைத் தகனம் செய்ய முயற்சித்துள்ளார். இந்தச் செயல் காரணமாக வீட்டிலிருந்து கடும் புகையும் துர்நாற்றமும் வீசியதையடுத்து, அப்பகுதி மக்கள் காவல் துறையினருக்குத் தகவல் கொடுத்தனர். சம்பவ இடத்திற்கு விரைந்து வந்த போலீஸார், குளியலறையில் எரிந்துகொண்டிருந்த தீயை அணைத்து எஞ்சிய உடல் பாகங்களைக் கைப்பற்றினர்.

மேலும் முதற்கட்ட விசாரணையில், அந்த குடும்பம் தந்தை இறந்த பிறகு கடும் மன உளைச்சலில் இருந்ததாகவும், லிபிகா விவாகரத்து பெற்று கடந்த சில ஆண்டுகளாகப் பல்வேறு சிக்கல்களில் இருந்ததாகவும் தெரியவந்துள்ளது. இது தற்கொலையா அல்லது கொலையா என்ற கோணத்தில் போலீஸார் தீவிர விசாரணை நடத்தி வருகின்றனர். ஒரு பெண்ணின் உடல் பல நாட்களாக வீட்டிலேயே இருந்ததும், இறுதியில் குளியலறையில் எரிக்கப்பட்டதும் அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.