“மகாராஷ்டிராவை பாருங்க முதல்வர் விஜய்.. தமிழ்நாட்டிலும் இதேமாதிரி செய்யனும்”.. அன்புமணி ராமதாஸ் கொடுத்த ரகசிய ஐடியா.. பரபரக்கும் அரசியல் களம்..!!

திருவண்ணாமலை மாவட்டம், போளூர் அடுத்த பொத்தரை கிராமத்தில் நடைபெற்ற பாமக கிளை கழக ஆலோசனைக் கூட்டத்தில் பங்கேற்ற அக்கட்சியின் தலைவர் மருத்துவர் அன்புமணி ராமதாஸ், பின்னர் செய்தியாளர்களைச் சந்தித்துப் பேசினார். அப்போது, நடந்து முடிந்த தமிழக சட்டமன்றத் தேர்தலில் போளூர் தொகுதியில் தேசிய ஜனநாயகக் கூட்டணியில் (NDA) போட்டியிட்டுப் தோல்வியடைந்த பாமக வேட்பாளர் சி.ஆர்.பாஸ்கரனின் தோல்விக்கான காரணங்கள் குறித்து பொதுமக்களிடமும் கட்சி நிர்வாகிகளிடமும் அவர் விரிவாகக் கேட்டறிந்தார். மேலும், கடந்த 60 ஆண்டுகளுக்குப் பிறகு தமிழக அரசியலில் ஏற்பட்டுள்ள பெரிய மாற்றத்தால் இளைஞர்கள் அதிக அளவில் அரசியலுக்கு வருவது வரவேற்கத்தக்கது என்றும், இந்த மாற்றம் எதிர்காலத்தில் பாமக ஆட்சிக்கு வழிவகுக்கும் என்றும் அவர் நம்பிக்கை தெரிவித்தார்.

செய்தியாளர்கள் சந்திப்பில் தமிழக அரசின் செயல்பாடுகள் குறித்துப் பேசிய அன்புமணி ராமதாஸ், வரும் சட்டமன்றக் கூட்டத்தொடரின் ஆளுநர் உரையில் சாதிவாரி கணக்கெடுப்பு தொடர்பான தமிழக அரசின் கொள்கை முடிவு கட்டாயம் அறிவிக்கப்பட வேண்டும் என வலியுறுத்தினார். அனைத்து சமூகங்களுக்கும் சமூக நீதி மற்றும் உரிமைகள் கிடைக்க வேண்டும் என்பதில் பாமக உறுதியாக இருப்பதாகக் குறிப்பிட்ட அவர், மகாராஷ்டிர மாநிலத்தைப் போன்று தமிழகத்திலும் விவசாயிகளின் பயிர்க்கடன்களை முழுமையாகத் தள்ளுபடி செய்ய வேண்டும் என்றும், தமிழகத்தில் ஆட்சி மாற்றத்திற்குப் பிறகும் போதைப்பொருள் விற்பனையைக் கட்டுப்படுத்த காவல்துறை போதிய நடவடிக்கை எடுக்கவில்லை என்றும் குற்றஞ்சாட்டினார்.

அண்டை மாநில நதிநீர் விவகாரம் மற்றும் மாவட்ட வளர்ச்சித் திட்டங்கள் குறித்தும் தனது கோரிக்கைகளை அன்புமணி ராமதாஸ் முன்வைத்தார். காவிரி ஆற்றின் குறுக்கே மேகதாது அணை கட்ட முயற்சிக்கும் கர்நாடக அரசின் நடவடிக்கைகளைத் தடுக்க தமிழக அரசு தீவிர நடவடிக்கை எடுக்க வேண்டும் எனத் தெரிவித்தார். மேலும், திருவண்ணாமலை மாவட்டத்தில் தென்பெண்ணையாற்றின் நீர் வீணாகக் கடலில் கலப்பதைத் தடுக்க செய்யாறு – பாலாற்றை இணைக்கும் திட்டத்தைச் செயல்படுத்த வேண்டும் என்றும், நந்தன் கால்வாய்க்காக தென்பெண்ணையாற்றில் இருந்து தனி கால்வாய் அமைக்க அரசு முன்வர வேண்டும் என்றும் அவர் வலியுறுத்தினார்.