“பதவி வேண்டுமா? பணத்தைக் கொடு!” – தவெக-வில் அரங்கேறும் பகீர் விற்பனை! விஜய்க்குத் தெரியாமல் நடக்கும் ‘ஆர்.கே. நகர்’ டீலிங்!

தமிழக சட்டசபை தேர்தல் நெருங்கி வரும் சூழலில், நடிகர் விஜய் தலைமையிலான தமிழக வெற்றிக் கழகம் (தவெக) முதல்முறையாகத் தேர்தல் களத்தைச் சந்திக்கத் தயாராகி வருகிறது. கட்சித் தொண்டர்கள் மற்றும் நிர்வாகிகள் மத்தியில் பெரும் எதிர்பார்ப்பு நிலவி வந்தாலும், தற்போது கட்சியின் உட்கட்டமைப்பில் எழுந்துள்ள சலசலப்புகள் தலைமைக்குப் பெரும் சவாலாக மாறியுள்ளன. குறிப்பாக, சென்னை ஆர்.கே. நகர் பகுதியில் தவெக மாவட்டச் செயலாளர் மீது எழுந்துள்ள ஊழல் புகார்கள் அக்கட்சியின் தூய்மையான அரசியல் பிம்பத்திற்குப் பின்னடைவை ஏற்படுத்தியுள்ளன.

ஆர்.கே. நகர் பகுதியைச் சேர்ந்த நிர்வாகி பாபு என்பவர் முன்வைத்துள்ள குற்றச்சாட்டுகள் அதிரடியாக உள்ளன. மாவட்டச் செயலாளர் கட்சியினரிடம் பணம் வாங்கிக்கொண்டு பதவிகளை விற்பனை செய்வதாகவும், சொந்தப் பணத்தைச் செலவு செய்யாமல் நிர்வாகிகள் தரும் பணத்தில் தனது பிறந்தநாளைக் கொண்டாடுவதாகவும் அவர் சாடியுள்ளார். கடந்த 10 ஆண்டுகளாக விஜய் மக்கள் இயக்கத்திற்காகக் கடுமையாக உழைத்தவர்களைப் புறக்கணித்துவிட்டு, பணபலம் உள்ளவர்களுக்கு மட்டுமே முக்கியத்துவம் அளிக்கப்படுவதாகவும், பொதுச் செயலாளர் அறிவுறுத்தியும் தனக்குப் பதவி வழங்கப்படவில்லை என்றும் அவர் தனது குமுறலை வெளிப்படுத்தியுள்ளார்.

உட்கட்சிப் பூசல் என்பது ஆர்.கே. நகருடன் மட்டும் நின்றுவிடவில்லை. சில வாரங்களுக்கு முன்பு தூத்துக்குடியைச் சேர்ந்த பெண் நிர்வாகி அஜிதா என்பவர், சென்னை பனையூர் அலுவலகத்தில் விஜய் காரை மறித்துப் போராட்டத்தில் ஈடுபட்ட சம்பவம் தமிழகம் முழுவதும் விவாதமானது. தலைமை தனது கோரிக்கைகளைக் கண்டுகொள்ளாத நிலையில், அவர் தூக்க மாத்திரை உட்கொண்டு தற்கொலைக்கு முயன்றது தவெக வட்டாரத்தில் பெரும் அதிர்ச்சியை ஏற்படுத்தியது. இவ்வாறு தமிழ்நாடு முழுவதும் பல்வேறு மாவட்டங்களில் பதவிப் பகிர்வு தொடர்பாகத் தொண்டர்களிடையே குமுறல்கள் அதிகரித்து வருகின்றன.

தேர்தல் களம் சூடுபிடித்துள்ள நிலையில், அடிமட்டத் தொண்டர்களின் இத்தகைய அதிருப்தி மற்றும் போராட்டங்கள் கட்சியின் வெற்றி வாய்ப்பைப் பாதிக்கக்கூடும் என அரசியல் விமர்சகர்கள் கருதுகின்றனர். “உழைப்பவர்களுக்கு உயர்வு” என்ற கொள்கையோடு செயல்படுவதாகக் கூறும் தலைமை, கீழ்மட்ட நிர்வாகிகளின் செயல்பாடுகளைக் கண்காணித்துச் சீரமைக்கத் தவறினால், இது வரும் தேர்தலில் தவெகவுக்குப் பெரும் தலைவலியை ஏற்படுத்தும் என்பதில் மாற்றுக் கருத்தில்லை.