பகீர்… 1,900 அந்தரங்கப் படங்கள், 400 வீடியோக்கள்… நூற்றுக்கும் மேற்பட்ட பெண்களைச் சீரழித்த… காசிக்கு வாழ்நாள் சிறை… உயர் நீதிமன்றம் அதிரடி தீர்ப்பு…!

நாகர்கோவில் காசிக்கு விதிக்கப்பட்ட ஆயுள் தண்டனையை சென்னை உயர் நீதிமன்ற மதுரைக்கிளை இன்று உறுதி செய்து தீர்ப்பளித்துள்ளது. இளம் பெண்களை ஏமாற்றி, ஆபாசப் படங்கள் மற்றும் வீடியோக்கள் எடுத்து மிரட்டிய வழக்கில் கீழ் நீதிமன்றம் வழங்கிய இந்த வாழ்நாள் சிறை தண்டனையை எதிர்த்து காசி தரப்பில் தாக்கல் செய்யப்பட்ட மேல்முறையீட்டு மனுவை விசாரித்த நீதிமன்றம், அதனைத் தள்ளுபடி செய்து இந்த உத்தரவைப் பிறப்பித்துள்ளது. இதுமட்டுமின்றி, கந்துவட்டி மற்றும் மிரட்டல் வழக்குகளிலும் இவருக்கு தனித்தனியாக சிறை தண்டனைகள் விதிக்கப்பட்டிருந்தது குறிப்பிடத்தக்கது.

இந்த வழக்கின் சி.பி.சி.ஐ.டி விசாரணையின் போது காசியின் மடிக்கணினியில் இருந்து சுமார் 1,900 ஆபாசப் புகைப்படங்கள் மற்றும் 400 ஆபாச வீடியோக்கள் கைப்பற்றப்பட்டது பெரும் அதிர்ச்சியை ஏற்படுத்தியது. பெண்களைக் காதல் வலையில் வீழ்த்தி, ஆபாசமாகப் படம் பிடித்து, அவற்றைக் காட்டி மிரட்டி பணம் பறிப்பதையே இவர் வழக்கமாகக் கொண்டிருந்தார் என்பது விசாரணையில் அம்பலமானது. இந்த டிஜிட்டல் ஆதாரங்கள் மற்றும் பாதிக்கப்பட்ட பெண்களின் வாக்குமூலங்களின் அடிப்படையில் காசிக்கு வழங்கப்பட்ட தண்டனை முற்றிலும் சரியானது என நீதிமன்றம் உறுதிபடத் தெரிவித்துள்ளது.

இத்தீர்ப்பை வழங்கிய உயர் நீதிமன்ற மதுரைக்கிளை, இன்றைய காலகட்டத்தில் இளம் பெண்கள் மிகவும் விழிப்புணர்வுடன் இருக்க வேண்டும் என்று மிக முக்கிய அறிவுரையை வழங்கியுள்ளது. தொழில்நுட்பமும் சமூக ஊடகங்களும் வளர்ந்துள்ள இந்தச் சூழலில், அடையாளம் தெரியாத நபர்களிடம் பழகும்போதும், தங்களின் தனிப்பட்ட விவரங்களைப் பகிரும்போதும் பெண்கள் கூடுதல் எச்சரிக்கையுடன் செயல்பட வேண்டும் என நீதிபதிகள் சுட்டிக்காட்டியுள்ளனர். இத்தகைய விழிப்புணர்வு மட்டுமே எதிர்காலத்தில் இதுபோன்ற கொடூரமான குற்றங்களில் இருந்து தங்களைப் பாதுகாத்துக் கொள்ள உதவும் என்றும் நீதிமன்றம் வலியுறுத்தியுள்ளது.