“பேச்சுவார்த்தைலாம் அப்பறம்.. முதல்ல அடி வாங்குங்க!”.. ஈரானை போட்டுத் தள்ளிட்டு அமெரிக்கா கொடுத்த பன்ச் லைன்.. பதறும் உலக நாடுகள்..!!

அமெரிக்கா மற்றும் ஈரான் இடையே நிரந்தர போர் நிறுத்தத்தை ஏற்படுத்துவதற்கான அமைதிப் பேச்சுவார்த்தைகள் தீவிரமாக நடைபெற்று வரும் நிலையிலும், இரு நாடுகளுக்கும் இடையேயான ராணுவ மோதல் மீண்டும் வெடித்துள்ளது. தெற்கு ஈரானில் உள்ள ஏவுகணை ஏவுதளங்களையும், கண்ணிவெடிகளை புதைக்க முயன்றதாகக் கூறப்படும் படகுகளையும் குறிவைத்து அமெரிக்க ராணுவம் திடீர் தாக்குதலை நடத்தியுள்ளது. இந்த அதிரடி நடவடிக்கையால், அந்த பிராந்தியத்தில் அமைதி முயற்சி பாதிக்கப்பட்டு மீண்டும் போர் தொடங்குமோ என்ற அச்சமும் பதற்றமும் உலகளவில் அதிகரித்துள்ளது.

இந்த ராணுவ நடவடிக்கை குறித்து விளக்கம் அளித்துள்ள அமெரிக்க மத்திய கட்டளைப் பிரிவின் செய்தித் தொடர்பாளரும், கடற்படை கேப்டனுமான டிம் ஹாக்கின்ஸ், ஈரானியப் படைகளால் ஏற்படும் அச்சுறுத்தல்களிலிருந்து தங்களது பணியாளர்களையும் துருப்புக்களையும் பாதுகாப்பதற்காகவே இந்த ‘தற்காப்புத் தாக்குதல்கள்‘ நடத்தப்பட்டதாகத் தெரிவித்துள்ளார். மேலும், ராணுவ ரீதியாக இந்த நடவடிக்கை மேற்கொள்ளப்பட்ட போதிலும், தொடர்ந்து நடைபெற்று வரும் போர்நிறுத்தத்தின் போது அமெரிக்க மத்திய கட்டளைப் பிரிவு தொடர்ந்து நிதானத்தையே கடைப்பிடித்து வருவதாகவும் அவர் குறிப்பிட்டுள்ளார்.

அதிபரான டொனல்ட் ட்ரம்ப், ஈரானுடனான ராஜதந்திர ரீதியான பேச்சுவார்த்தைகள் “சிறப்பாக நடைபெற்று வருகின்றன” என்று தனது சமூக வலைதளப் பக்கத்தில் பதிவிட்டிருந்த சூழலிலேயே இந்தத் தாக்குதல்கள் அரங்கேறியுள்ளன. எனினும், பேச்சுவார்த்தைகளின் தற்போதைய நிலை குறித்தோ அல்லது இந்த திடீர் ராணுவ நடவடிக்கை வாஷிங்டனுக்கும் டெஹ்ரானுக்கும் இடையிலான அமைதி முயற்சிகளை எவ்வாறு பாதிக்கும் என்பது குறித்தோ அதிகாரிகள் இதுவரை முறையான மற்றும் குறிப்பிட்ட தகவல்களை வெளியிடவில்லை.

அதேவேளையில், ஈரான் உடனான எந்தவொரு அமைதி ஒப்பந்தத்திலும், இஸ்ரேலுடன் உறவுகளை இயல்பாக்குவதற்காக உருவாக்கப்பட்ட ‘ஆபிரகாம் உடன்படிக்கை‘யின் விரிவாக்கம் ஒரு நிபந்தனையாக சேர்க்கப்பட வேண்டும் என்று ட்ரம்ப் வலியுறுத்தியுள்ளார். உள்நாட்டில் குடியரசுக் கட்சியினர் மற்றும் பழமைவாதிகளின் விமர்சனங்களுக்கு மத்தியில், சவூதி அரேபியா, கத்தார், பாகிஸ்தான், துருக்கி, எகிப்து மற்றும் ஜோர்டான் ஆகிய நாடுகள் ஒரே நேரத்தில் இந்த உடன்படிக்கையில் “உடனடியாக” கையெழுத்திட வேண்டும் என்பதை ட்ரம்ப் கட்டாயமாக்கியுள்ளார்.