செம ஷாக்..! மூத்த நிர்வாகிகளுக்கு கட்டாய ஓய்வு.? இள ரத்தங்களுக்கு வழிவிட “100 பிளான்”.. ஸ்டாலினின் ரகசிய ரிப்போர்ட் அம்பலம்..!!

திராவிட முன்னேற்றக் கழகத்தில் (திமுக) உள்கட்சி ரீதியாகப் பெரும் மாற்றங்களைச் செய்யக் கட்சித் தலைவர் மு.க. ஸ்டாலின் ‘மாஸ்டர் ஸ்கெட்ச்’ ஒன்றை தயாரித்துள்ளதாகத் தகவல்கள் வெளியாகியுள்ளன. இதன்படி, தற்போதுள்ள 78 கட்சி மாவட்டங்களை, நிர்வாக வசதிக்காக 100 மாவட்டங்களாகப் பிரிப்பதற்கான பிரம்மாண்டத் திட்டம் வகுக்கப்பட்டுள்ளது. கட்சியின் அடித்தளத்தை மேலும் வலுப்படுத்தவும், வரும் சவால்களை எதிர்கொள்ளவும் இந்த அதிரடி நடவடிக்கை மேற்கொள்ளப்பட உள்ளதாக அரசியல் வட்டாரங்கள் தெரிவிக்கின்றன.

இந்த புதிய மறுசீரமைப்புத் திட்டத்தின்படி, நீண்ட காலமாக ஒரே பொறுப்பில் நீடித்து வரும் கட்சியின் மூத்த நிர்வாகிகள் மற்றும் மாவட்டச் செயலாளர்கள் பலர் பதவிகளில் இருந்து அதிரடியாக நீக்கப்பட வாய்ப்புள்ளதாகக் கூறப்படுகிறது. மூத்த நிர்வாகிகளைத் தேர்தல் பணிகளில் மட்டும் பயன்படுத்திக் கொண்டு, கட்சி மாவட்டங்களின் தலைமைப் பொறுப்புகளைச் செயல்பாட்டுத் துடிப்பும், புதிய உத்திகளும் கொண்ட இள ரத்தங்களுக்கு வழங்க மு.க. ஸ்டாலின் திட்டமிட்டுள்ளார். இதன் மூலம் கட்சியின் இரண்டாம் கட்டத் தலைவர்களை அதிகளவில் உருவாக்க திமுக தலைமை முற்படுகிறது.

குறிப்பாக, அண்மையில் அமைக்கப்பட்ட 36 பேர் கொண்ட சிறப்புக் குழு, அடிமட்டத் தொண்டர்களிடம் 14 ரகசியக் கேள்விகள் அடங்கிய நேர்காணலை நடத்தி அறிக்கை சமர்ப்பித்துள்ள நிலையில், இந்த மாற்றங்கள் இறுதி செய்யப்பட்டுள்ளன. மாவட்டங்கள் பிரிக்கப்படும் போது உள்ளூர் அளவில் ஏற்படும் அதிருப்திகளைச் சமாளிக்கவும், புதிய மாவட்டச் செயலாளர்களாக யாரை நியமிப்பது என்பது குறித்தும் அறிவாலயம் வட்டாரத்தில் தீவிர ஆலோசனைகள் நடந்து வருகின்றன. இந்த அதிரடிப் புனரமைப்புத் திட்டம், திமுகவின் உள்ளூர் நிர்வாகிகள் மற்றும் மூத்த தலைவர்கள் மத்தியில் தற்போது பெரும் கலக்கத்தையும் பரபரப்பையும் ஏற்படுத்தியுள்ளது.