உலகளவில் கெத்து காட்டும் இந்தியா…! ஒரே வாரத்தில் 4 கின்னஸ் சாதனைகள்…. தேசிய நெடுஞ்சாலை ஆணையம் அதிரடி…!

பெங்களூரு – விஜயவாடா இடையேயான பொருளாதார வழித்தட கட்டுமானப் பணியில், இந்திய தேசிய நெடுஞ்சாலை ஆணையம் (NHAI) ஒரே வாரத்தில் நான்கு கின்னஸ் உலக சாதனைகளை நிகழ்த்தி வரலாற்றுச் சாதனை படைத்துள்ளது. கடந்த ஜனவரி 6-ம் தேதி 24 மணி நேரத்திற்குள் சுமார் 29 கி.மீ தூரத்திற்குத் தார்ச் சாலை அமைத்தும், 10,655 மெட்ரிக் டன் தார் கலவையைப் பயன்படுத்தியும் முதல் இரண்டு சாதனைகள் எட்டப்பட்டன.

இதனைத் தொடர்ந்து ஜனவரி 11-ம் தேதி 156 லேன் கி.மீ தூரத்திற்குச் சாலை அமைத்தது மற்றும் 57,500 மெட்ரிக் டன் தாரைப் பயன்படுத்தியது என அடுத்தடுத்த சாதனைகளை இந்தியப் பொறியாளர்கள் படைத்து உலகையே வியக்க வைத்துள்ளனர்.

சுமார் 343 கி.மீ நீளம் கொண்ட இந்த ஆறு வழிச் சாலைத் திட்டம் முழுமையடையும் போது, பெங்களூரு – விஜயவாடா இடையிலான பயண தூரம் 100 கி.மீ வரை குறையும். இதன் மூலம் 12 மணி நேரப் பயணம் வெறும் 6 முதல் 8 மணி நேரமாகப் பாதியாகக் குறையும் என்பதால் வர்த்தகம் மற்றும் போக்குவரத்துப் பெரும் வளர்ச்சியடையும்.

சுரங்கப்பாதைகள், மேம்பாலங்கள் எனப் பல்வேறு நவீன வசதிகளுடன் உருவாகும் இந்தச் சாலை, இந்தியாவின் உள்கட்டமைப்பு வலிமையை உலகிற்குப் பறைசாற்றும் விதமாக அமைந்துள்ளது. இந்த இமாலய வெற்றியை மத்திய அமைச்சர் நிதின் கட்கரி மற்றும் ஆந்திர முதல்வர் சந்திரபாபு நாயுடு ஆகியோர் வெகுவாகப் பாராட்டியுள்ளனர்.